Qaraǵandy oblysynda sanıtarlyq talaptar men abattandyrý erejelerin saqtaý maqsatynda aýqymdy ekologııalyq is-sharalar qolǵa alyndy. Bul jumystar respýblıkalyq «Taza Qazaqstan» aksııasy aıasynda oblystyq polısııa departamentiniń uıymdastyrýymen júzege asyrylyp jatyr, dep habarlaıdy Egemen.kz.
Jyl basynan beri óńirde 32 myńnan astam ákimshilik quqyq buzýshylyq anyqtalǵan. Bul kórsetkish ekologııalyq mádenıetti arttyrý jáne zań talaptaryn saqtaý máselesiniń ózektiligin aıqyn kórsetip otyr.
Polısııa qyzmetkerleri abattandyrý erejelerin buzǵan nysandardy anyqtaý boıynsha turaqty reıdtik is-sharalar júrgizýde. Ereje buzǵandar qatarynda iri saýda ortalyqtary, dúkender, shaǵyn dámhanalar, janarmaı quıý beketteri men qurylys nysandary bar.
Júrgizilgen jumystar nátıjesinde qorshaǵan orta men turǵyndardyń densaýlyǵyna qaýip tóndirgen 472 ruqsatsyz qoqys úıindisi joıyldy.
Ruqsat etilmegen qaldyqtar ornyn anyqtaý maqsatynda polısııa zamanaýı beınebaqylaý júıelerimen jabdyqtalǵan drondardy belsendi túrde paıdalanyp keledi.
Aýlalar men kireberisterdiń tıisti kútimin qamtamasyz etpegen 36 PIK (OSI) tóraǵasy men 14 úı starshınasy ákimshilik jaýapkershilikke tartyldy.
Sondaı-aq óz aýmaǵyn qorshamaı, qoqys jınalýyna jol bergen 20 jer ıesine buzýshylyqtardy joıý týraly nusqama berildi.
Belgilenbegen oryndarǵa qaldyq tókken 74 júrgizýshige qatysty sharalar qabyldandy. Olardyń kólikteri aıyppul tólenip, lastanǵan aýmaq tazartylǵanǵa deıin aıypturaqqa qoıyldy.
Tek sońǵy apta ishinde oblys aýmaǵynda 500-den astam quqyq buzýshylyq anyqtalyp, 4 júk kóligi men 33 jeńil avtokólik ustaldy.
Polısııa departamenti óńir turǵyndaryn qoǵamdyq oryndarda tazalyq pen tártipti saqtaýǵa shaqyrady.