Jyl saıyn kúzde atalyp ótetin «Qala kúni» merekesine bıyl erekshe mán berildi. Ortalyq alańmen qatar oblys ortalyǵyna qarasty aýyldarda da ótip jatqan merekelik sharalar Qyzylorda qalasynyń astana atanǵanyna 100 jyl tolýyna arnalyp otyr.
Tasbóget kentindegi S.Maıqanova atyndaǵy mádenıet úıi qala tarıhyndaǵy bir beles sanalatyn kezeńniń ǵasyrlyq toıyna tamasha tartý jasady. Kenttegi keń alańda tizile otyrǵan 100 bala Qurmanǵazynyń «Balbyraýyn» kúıin oryndady. Ulttyq ónerdi dáriptegen ulandar mereke qarsańynda qalalyqtarǵa rýhanı azyq syılady.
Mádenıet úıiniń nusqaýshysy Sánimkúl Qaıyńbaevanyń aıtýynsha, bul balalardyń bári dombyra úıirmesine qatysady eken. Olardyń qatarynda №11, 257, 172, 176 mektep oqýshylary men mádenıet úıi janyndaǵy «Balbyraýyn», «Salamatty jastar» shyǵarmashylyq ortalyǵyndaǵy úıirme músheleri bar.
Júz jyldyqqa arnaǵan júz balanyń kúıi kósheni kúmbirletip, kórermen qatary sát sanap kóbeıe berdi. «Úıirmege qatysýshylar áýeli kúı álippesin «Balbyraýynnan» bastaıtyny belgili ǵoı. Ony tartqan adam da, tyńdaǵan jan da arqalanyp, aıbarlanyp ketetini anyq. Sondyqtan 100 balanyń 100 jyldyqqa tartýy osy kúı bolǵanyn durys kórdik. Mundaı is-shara keleshekte de uıymdastyrylmaq», deıdi S.Maıqanova atyndaǵy mádenıet úıiniń nusqaýshysy.
Qyzylorda