Batys Qazaqstan oblysynyń Qaratóbe aýdanynda ulttyq qundylyqty ulyqtap, eńbek adamyn dáriptegen «Aýylym – altyn besigim» atty etnofestıval ótti.
Festıval aıasynda túrli salada jemisti eńbek etip júrgen azamattarǵa oblys, aýdan ákimdiginiń, salalyq basqarmalar men kásipodaq uıymdarynyń alǵyshattary men tósbelgileri tabys etildi. Olardyń qatarynda «Nurasyl» sharýa qojalyǵynyń mehanızatory Júsip Máýleshuly, mektep santehnıgi Rysbaı Qojahmetuly, «Qaıyr» sharýa qojalyǵynyń shopany Nurbergen Haırollauly, «Dosjan» sharýa qojalyǵynyń malshysy Manarbek Bekenuly, «Nurqoja» sharýa qojalyǵynyń mehanızatory Erbolat Qýanyshuly, «Ahat» sharýa qojalyǵynyń mehanızatory Maksım Ándiruly, taǵy basqalary bar.
Veterınarııa salasynyń ardagerleri Marat Ýahıtuly, Erlan Qaldybaıuly, Serik Opauly, Mergenǵalı Kákimuly, Sábıt Májıtuly Aýyl sharýashylyǵy Ardagerler keńesiniń «Qurmetti ardageri» tósbelgisimen marapattaldy.
Mereke aıasynda aýyl sharýashylyǵy jármeńkesi uıymdastyryldy, «Jyraýlar sherýi», «Qadyr oqýlary», retro ánder festıvali ótti. Áýesqoı jyrshy Sáken Janǵazıev «Qyz Jibekti», belgili ónerpaz, jyrshy Farhat Orazov «Syrym batyrdy» jyrlady. Aqjaıyq óńirine tanymal órimshi Ulan Janbotauly qamshy órýden sheberlik sabaǵyn ótkizdi. Belgili tazy baptaýshy Raýan Satybaldıev saıat óneri týraly áńgimelep berdi. Jıyn sońy júldesine avtokólik tigilgen at báıgesimen, arqan tartý, aýdaryspaq, qazaqsha kúres sekildi ulttyq oıyndarǵa ulasty.
Batys Qazaqstan oblysy