Respýblıka kúni qarsańynda Ulytaý oblystyq tarıhı-arheologııalyq mýzeıinde usta, zerger, sýretshi-restavrator, QR «Mádenıet qaıratkeri» tósbelgisiniń ıegeri, Qazaqstan Sýretshiler odaǵynyń jáne Dızaınerler odaǵynyń múshesi Erǵazy Isataevtyń 60 jas mereıtoıyna arnalǵan shyǵarmashylyq kesh ótti, dep habarlaıdy Egemen.kz.
Kesh qolóner sheberiniń uzaq jyl boıy ulttyq qolónerdi damytýǵa qosqan eńbegine arnaldy. Aldymen altyn qoldy zergerdiń ómiri men shyǵarmashylyǵyn arqaý etken beınebaıan kórsetildi.
«Usta murasy: sheberlik pen dástúr» atty kórmege týyndylary qoıylyp, kópshilik nazaryna usynyldy.
Ulytaý oblysynyń Mádenıet, tilderdi damytý jáne arhıv isi basqarmasynyń basshysy Maǵjan Tabyldın kesh ıesin mereıtoımen quttyqtady. Sonymen qatar mereıtoı ıesine «Amanat» partııasy Ulytaý oblystyq fılıalynyń atqarýshy hatshysy Erlan Myrzabekov, Jezqazǵan qalalyq máslıhatynyń tóraǵasy Raýshan Qaparova jyly lebizin bildirdi.
Erǵazy Keńesulynyń shyǵarmashylyǵyna arnalǵan «Usta óneriniń san qyry» atty jańa kitaptyń tusaýyn QR Qolónershiler odaǵynyń múshesi, halyqaralyq IýNESKO sapa belgisiniń ıegeri, ulttyq kıim dızaıneri Tilek Sultan jáne qolóner sheberi, QR «Mádenıet salasynyń úzdigi» tósbelgisiniń ıegeri Sarbas Júnisov kesti.
Mereıli jasqa kelgen kesh ıesine QR eńbek sińirgen ártisi Serik Ospanov pen Ulytaý oblystyq fılarmonııasynyń ánshisi Ardaq Muqyshev ánnen shashý shashty.
Ulytaý oblystyq tarıhı-arheologııalyq mýzeıiniń dırektory Zaǵıra Qalmenova jáne mýzeı ardagerleri dástúr jalǵastyǵyn dáriptep kele jatqan Erǵazy Keńesulynyń ulttyq ónerge qosqan zor úlesin qurmetpen atap ótip, mýzeı ujymy atynan estelik syı-sııapat jasady.
Ulytaý oblysy