Elimizde 25 qazan – Respýblıka kúni merekesi toılanady. Bul data – táýelsizdiktiń bastaýy sanalatyn Qazaq KSR-niń Memlekettik egemendigi týraly Deklarasııasy qabyldanǵan kún. Bıyl osy mańyzdy tarıhı qujattyń qabyldanǵanyna 35 jyl tolyp otyr. Egemendikpen qatar eseıgen býyn búginde elimizdiń túrli salasynda eńbek etip, qoǵamnyń damýyna óz úlesin qosýda. Solardyń qatarynda Qonaev qalasynyń turǵyndary da bar.
Atap aıtsaq, Gýzal Abdýlova 8 jyldan beri Qonaev qalasynyń kópsalaly aýrýhanasynda akýsher-gınekolog bolyp qyzmet etýde. Ol kún saıyn jańa ómirdiń bastaýyna kýá bolyp, ana men sábılerdiń amandyǵyna jaýap beredi.
«Respýblıka kúnin erekshe sezimmen qarsy alamyn. 1990 jyldyń 25 qazanynda Deklarasııa qabyldandy. Sol jyly dúnıege keldim. Bul – el táýelsizdiginiń irgesi qalanǵan mańyzdy kún. 35 jyldan beri elimiz túrli qıyndyqtardan ótip, jetistikterge jetti. Ár sábı ashyq aspan astynda dúnıege kelip jatyr. Munyń ózi barsha jurtqa – baqyt. Endeshe, elimiz máńgilik bolsyn», – deıdi dáriger.
Al Serik Ordabaev bolsa 10 jyl boıy qoǵamdyq tártiptiń, jol qaýipsizdiginiń saqtalýyna úles qosyp keledi. Ol Otanyna adal qyzmet etýdi azamattyq boryshy dep esepteıdi. Qonaev qalasy Patrýldik polısııa qyzmeti ınspektorynyń da jasy 35-te.
«Men úshin «egemendik» uǵymy otbasymnyń amandyǵymen úndesedi. Otansyz adam – ormansyz bulbul tárizdi. Jubaıym ekeýmiz elimizben birge ósip-ónip kelemiz. Táýelsizdik urpaqtaryn tárbıelep otyrmyz. Merekemen barshańyzdy quttyqtaımyn» – dedi aǵa leıtenant.
О́skeleń urpaqtyń boıyna patrıottyq pen ultjandylyqty, otansúıgishtikti sińirip júrgen ulaǵatty ustazdardyń biri Ǵalııa Mojanova da elimizdiń egemendigi – bolashaqqa jasalǵan senimdi qadam ekendigin tilge tıek etti.
Osylaısha táýelsizdik qurdastarynyń ómir joly elmen birge qalyptasyp, memleketpen birge kemeldenip keledi. Olardyń eńbektegi tabandylyqtary táýelsiz Qazaqstannyń gúldenýi men damýyna súbeli septigin tıgizýde.
Almaty oblysy.