Qazaqstanda tuńǵysh ret taekvondodan (WT) Álem chempıonaty ótedi. Bul týraly sheshim búgin Ýsı qalasynda Dúnıejúzilik taekvondo (WT) federasııasynyń Álem chempıonaty aıasyndaǵy jıynynda resmı habarlandy.
Osyǵan deıin Qazaqstan 2027 jylǵy Álem chempıonatyn ótkizýge úmitker elderdiń qataryna qosylǵan bolatyn. Búgingi jıyn barysynda Dúnıejúzilik taekvondo federasııasy men oǵan múshe elderdiń ókilderi Qazaqstannyń kandıdatýrasyn biraýyzdan qoldady.
«Qazaqstandy taekvondodan Álem chempıonatyn qabyldaýǵa qaýqarly elmiz dep sanaımyn. Biz kez kelgen jarysty joǵary dárejede, álemdik talaptarǵa saı qabyldaı alatynymyzdy Astanada ótken «Kazakhstan Open» jarysynda dáleldedik dep oılaımyn. Tamyz aıynda ótken halyqaralyq jarysymyzǵa 700-den astam sportshy qatysty. Odan bólek, Dúnıejúzilik taekvondo federasııasynyń prezıdenti doktor Chýngvon Choý myrzadan bastap, jarysymyzǵa qonaq bolǵan barlyq ókil joǵary baǵalady.
Bizdiń sportshylarymyz da, tóreshilerimiz de, mamandarymyz da osy ýaqyt aralyǵynda shyńdaldy jáne Álem chempıonatyn qabyldaýǵa ábden daıyn.
2028 jylǵy Los-Andjeleste ótetin Jazǵy Olımpıada oıyndary aldyndaǵy sheshýshi ári jaýapkershiligi mol Álem chempıonatyn elimizde ótkizý biz úshin úlken mártebe. Elimizdiń atyn dúnıejúzilik taekvondo kartasynda belgileıtinimizge qýanyshtymyz! Barsha Qazaq elin osyndaı súıinshi jańalyqpen quttyqtaımyn. Bul bizdiń jumyla atqarǵan jumysymyzdyń jemisiniń biri», - dedi Qazaqstandyq taekvondo (WT) federasııasynyń prezıdenti Kýdrát Shamıev.
Osylaısha, Qazaqstan Orta Azııada taekvondodan (WT) Álem chempıonatyn qabyldaıtyn alǵashqy el bolyp tirkeldi. Federasııa 2027 jylǵy Álem chempıonatyn Astana qalasynda ótkizýdi josparlaýda.
Aıta keterligi, qazirgi tańda Ýsı qalasyna álemniń 179 elinen 991 taekvondoshysy 2025 jylǵy Álem chempıonatyna qatysýǵa jınaldy. 24-30 qazan aralyǵynda ótetin álem birinshiliginde el namysyn 16 taekvondoshy qorǵady.