О́ńirlik kásipkerler palatasy janyndaǵy Isker áıelder keńesiniń qurylǵanyna 10 jyl toldy. Osyǵan oraı Shymkentte kásipker áıelderdiń III aımaqtyq bıznes forýmy ótti. Atalǵan jıynǵa Prezıdent janyndaǵy Áıelder isteri jáne otbasy-demografııalyq saıasat jónindegi ulttyq komıssııanyń, Shymkent qalasy ákimdiginiń ókilderi, «ASMAR» Qazaqstan kásipker áıelderi ulttyq qaýymdastyǵynyń jetekshileri, sondaı-aq elimizdiń ár óńirinen kelgen bıznestegi áıelder qaýymy qatysty.
Forýmnyń ashylý saltanatynda Shymkent qalasy ákiminiń orynbasary Sársen Quranbek sóz sóılep, is-sharanyń mán-mańyzy, áıelderdiń qoǵamdaǵy orny týraly aıtty.
«Jalpy, elimizdegi áıel, qyz-kelinshekter qashan da óziniń názik qalpymen otbasynyń shyraqshysy bolyp keledi. Jaryna súıeý bolatyn da, bala tárbıelep, ana bolatyn da áıelder. Sonymen qatar búginde áıelder otbasy, oshaq qasynda qala bermeı, memleket isine aralasyp, ekonomıkanyń damýyna óz úlesterin qosyp jatyr. Qazirdiń ózinde kásipkerlik salasynda áıelderdi kóp kezdestirýge bolady. Shaǵyn jáne orta kásipkerlik nysandaryna jetekshilik etetin, tipti iri kásiporyndardy basqaratyn áıelder bar. Olardyń bilimi men biliktiligi er azamattardan bir mysqal da kem emes. Áıel basqarǵan ujymda analyq meıirim sezilip turady. Dala demokratııasyna súıengen qazaq qoǵamynda áıeldiń ózindik quqyǵy men erkindigi boldy. Sonyń bir dáleli qazaq halqy qyz balasyn qatty qurmettegen. Bul salt búgingi zamanǵa jetip áli kúnge deıin saqtalyp keledi. Elimizde kásipkerlik, ekonomıka salasynan bólek, saıasatta júrgen áıelderdiń de qatary keıingi ýaqytta artyp kele jatqany belgili. Basqarýshylyq tizgin kimniń qolyna tıse de, eń bastysy adaldyq pen ádilettiliktiń aq jolynan adasyp ketpeý mańyzdy. Teńdik pen erkindik saltanat qurǵan qoǵamda demokratııa qaǵıdasymen birge erejeler men zańdar qatań saqtalatyn quqyqtyq talaptar mindetti túrde oryndalýǵa tıis. Bul – azamattardyń tegine, jynysyna qaramastan árbir qoǵam múshesine qoıylatyn mindetter», dedi S.Quranbek.
Jıyn barysynda qala ákiminiń orynbasary birqatar kásipker áıeldi marapattap, Alǵyshat tabystady. Olardyń qatarynda Alma Arhabaeva, Farıda Bakıbaeva, Janna Baıtelıeva, Nılýfar Saıdýllaeva, Merýert Arhabaeva, Dılıafrýz Madıeva, Anna Zarýbına, Janat Kenjequlova, Taısııa Dıgaı, Dıana Karamanovalar bar. Olar – kásip bastap, shaǵyn jáne orta bıznes salasynyń órkendeýine bir kisideı atsalysqan jandar. Búginde kásipker áıelder qurǵan kompanııa elge paıdaly ónim óndirip, otandyq óndiristiń órkendeýine jol ashty. Odan bólek jańa kásiporyndarda qanshama adam eńbek etip, eldiń áleýmettik máselesiniń sheshim tabýyna oń áserin tıgizip keledi. Isker áıelder tájirıbeden bólek optımıstik ıakı halyqqa bolsyn degen janashyrlyq kózqarasymen de daralanady. Osy qasıetiniń arqasynda bıznestegi qyz-kelinshekter búginde abyroıdyń bıigine shyǵyp, eldiń alǵysyn arqalap júr.
Shymkent qalalyq kásipkerler palatasynyń dırektory Sabıra Adambekova isker azamattarǵa, onyń ishinde qyz-kelinshekterge kórsetilip jatqan qyzmet, qoldaý týraly aıtyp berdi.
«Kásipkerler palatasy qaladaǵy kásipkerlikti damytý jolynda belsendi jumys atqaryp keledi. «Azamattarǵa arnalǵan úkimetpen» birge palatada kásipkerlerge kópsalaly qyzmet kórsetý ortalyǵy ashyldy. Onda zańdy tulǵalarǵa qatysty 800-ge jýyq memlekettik qyzmet «bir tereze» qaǵıdasy boıynsha iske asyrylady. Statıstıkaǵa júginsek, jyl basynan beri kásipkerlerge 9960 qyzmet usynyldy. Onyń ishinde býhgalterlik esep júrgizý, statıstıkalyq esepke alý sııaqty qyzmet túrleri basym. Sonymen qatar bıznes-jospar túzý, jyljymaıtyn múlikti memlekettik tirkeý, tehnıkalyq pasport berý sekildi qyzmetter de kóbirek suranysqa ıe. Bıznes-jospar ázirleý men súıemeldeý jumystarynyń nátıjesinde kásipkerlik sýbektileri jalpy somasy 1 mlrd 308 mln teńgege qarjylandyryldy. Sondaı-aq jańa jobalar iske asýynyń arqasynda 50-den astam jańa jumys orny quryldy. Odan bólek kásipkerler palatasy birneshe jyldan beri «Bir aýyl – bir ónim» jobasyn sátti júzege asyryp otyr. Shymkenttik sheberlerdiń isin damytyp, jergilikti ónimderdiń sapasyn arttyrýǵa, ilgeriletýge baǵyttalǵan bul jobaǵa qatysýshylar arasynda isker áıelder kóp. Olardyń bastamalary tyń jobalardy qolǵa alýmen erekshe. Osylaısha, áıel azamattardyń úlesiniń nátıjesinde megapolıste shaǵyn jáne orta kásipkerlik qanat jaıyp keledi. Ol óte jaqsy úrdis. Sebebi ekonomıkany alǵa súıreıtin tap osy shaǵyn jáne orta bıznestiń ókilderi. Shetelde onyń úlesi jalpy óńirlik ónim kóleminde óte joǵary. Biz de osyndaı kórsetkishke qol jetkizýimiz kerek. Sondyqtan isker áıelderden de kúter úmitimiz mol», dedi S.Adambekova.
Jıynǵa kásipkerler palatasynyń shaqyrýymen arnaıy qatysqan «Damý» kásipkerlikti damytý qory» AQ Shymkent qalalyq fılıaly dırektorynyń orynbasary Dýman Bajıkeı jınalǵan qaýymǵa bızneske qarjylaı, servıstik qoldaý kórsetý baǵdarlamalary týraly túsindirip berdi. Onyń aıtýynsha, «Damý» qory kásipkerlerdiń ekinshi deńgeıli bankterden alǵan nesıeleriniń paıyzdyq mólsherlemesine sýbsıdııa bólýmen qatar kepildik qoldaý kórsetýge de basa nazar aýdaryp otyr.
Forým barysynda ártúrli sala ókilderi sóz alyp, Isker áıelder qaýymdastyǵynyń qyz-kelinshekterdiń kásipkerlik bastamasyn júzege asyrýdaǵy mańyzyn atap ótti. Máselen, «ASMAR» Qazaqstan kásipker áıelderiniń ulttyq qaýymdastyǵy tóraıymy Lázzat Ramazanova qoǵamdyq uıymnyń qurylý tarıhyna toqtalsa, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa múshesi Baıan Jandosova osyndaı aýqymdy is-sharalar jastardyń qyzyǵýshylyǵyn arttyryp, jobalardy qalaı sátti júzege asyrý turǵysynan olarǵa úlgi-ónege bolatynyn atap ótti.
Jıyn barysynda Shymkent qalalyq Isker áıelder keńesiniń tóraıymy Alma Arhabaeva uıymnyń damý tarıhy men jetistikteri jóninde áńgimelep, kásipkerler palatasymen birge qolǵa alynǵan sátti jobalar týraly aıtyp berdi. Sondaı-aq forýmǵa elimizdiń ózge óńirlerinen kelgen Isker áıelder qaýymdastyǵynyń jetekshileri de sóz alyp, ártúrli kádesyılarmen marapattaldy. Odan ózge sán úlgilerinen defıle kórsetilip, jergilikti sheberlerdiń týyndylary qoıylǵan kórme uıymdastyryldy.