Sońǵy bes jylda QR Mádenıet jáne aqparat mınıstrligi mádenı biregeılikti nyǵaıtý, ulttyq ónerdi álemdik deńgeıde tanytý jáne kreatıvti ındýstrııalardy damytý baǵytynda aýqymdy jumystar atqardy. Bul kezeńde óner salasynda aıtarlyqtar ózgerister oryn alyp, Qazaqstandy Ortalyq Azııanyń jetekshi mádenı ortalyǵy retinde tanytty, dep habarlaıdy Egemen.kz.
Mınıstrliktiń málimetinshe, 2020 jyldan beri elimizdiń mádenı ómirinde mańyzdy ózgerister oryn aldy. Memleket mádenı saıasatty jańǵyrtýǵa, shyǵarmashylyq áleýetti arttyrýǵa jáne mádenı murany halyqaralyq deńgeıde dáripteýge basymdyq berdi. Osy maqsatta birqatar túbegeıli sheshimder qabyldandy. Qurmanǵazy atyndaǵy halyq aspaptary orkestri, M.Áýezov jáne Abaı atyndaǵy teatrlar, M.Lermontov atyndaǵy akademııalyq orys drama teatry men Ulttyq kitaphanaǵa «Ulttyq» mártebesi berildi. Sonymen qatar Q.Qýanyshbaev atyndaǵy qazaq mýzykalyq-drama teatry respýblıkalyq menshikke ótti.
Mádenı murany saqtaý baǵytynda da aıtarlyqtaı jetistikterge qol jetkizildi. 2022 jyly «Orteke» qýyrshaq bıi men Qojanasyr týraly ańyz IýNESKO-nyń reprezentatıvti tizimine endi. Qazaq estradasynyń sımvolyna aınalǵan «Gúlder» ansambli qaıta qurylyp, mádenıet pen óner salasynda myńdaǵan sharalar uıymdastyryldy. Roza Baǵlanova, Muhtar Áýezov jáne Ahmet Baıtursynovtyń mereıtoılaryna arnalǵan is-sharalar halyqaralyq deńgeıde keńinen atalyp ótti.
2023 jyl mádenı saıasatty júıeleý jyly boldy. Osy kezeńde Úkimet 2023–2029 jyldarǵa arnalǵan mádenı saıasat tujyrymdamasyn bekitti. Bul qujat mádenıettiń strategııalyq damý baǵytyn aıqyndap, halyqaralyq yntymaqtastyqqa serpin berdi. Sol jyly Sultan Beıbarystyń 800 jyldyǵyna oraı 660 is-shara uıymdastyryldy.
Qazaqstan mádenıeti kúnderi Ázerbaıjan, Armenııa, Túrkmenstan, Tájikstan, О́zbekstan, Reseı, Mysyr jáne basqa elderde joǵary deńgeıde ótti. Kaırde Sultan áz-Zahır Beıbarys meshitiniń ashylýyna qazaqstandyq delegasııa qatysty, al Tashkent pen Samarqandta «Abaı» operasy men «Qazaqkonsert» ujymynyń konsertteri tabysty ótti.
Sonymen qatar Qazaqstan Tájikstan, Ázerbaıjan jáne Saha Respýblıkasynyń (RF) mádenıet kúnderin uıymdastyrdy.
2024 jyl Qazaqstan mádenıetin halyqaralyq sahnada jańa deńgeıge shyǵardy. El alǵash ret Venesııa óner bıennalesinde ulttyq pavılonyn tanystyrdy. Parıjdegi Gıme mýzeıinde jáne Qytaıdyń Tıanszın qalasyndaǵy mýzeıde qazaq óneriniń kórmeleri ótti. Astanada Leonardo da Vınchıdiń «Ádemi hanshaıym» týyndysy kórsetilip, Qazaq Culture atty biryńǵaı mádenı onlaın-platforma iske qosyldy. Sonymen qatar jańa mýzykalyq ujymdar – Memlekettik klassıkalyq gıtarıster kvınteti men «Birlik» ansambli quryldy.
V Dúnıejúzilik kóshpendiler oıyndarynyń ashylý jáne jabylý saltanatynda Dımash Qudaıbergenniń óner kórsetýi eldiń mádenı ımıdjin aıshyqtady. Ashhabadta Qurmanǵazy men Abaıǵa, Dýshanbe men Qazanda Abaıdyń bıýsteri ornatyldy.
2025 jyly mádenı-gýmanıtarlyq yntymaqtastyq nyǵaıyp, jańa halyqaralyq kelisimder jasaldy. «Betashar» ulttyq salty IýNESKO-nyń reprezentatıvti tizimine engizildi, al О́zbekstanmen birlesken «Keste–sıýzanne» boıynsha ortaq nomınasııalyq qujat joldandy. Beıjiń qalasynda Qazaqstannyń Mádenıet ortalyǵy ashylyp, oǵan memleket basshysy Qasym-Jomart Toqaev, QR Mádenıet jáne aqparat mınıstri Aıda Balaeva, Qytaı Halyq Respýblıkasynyń Mádenıet jáne týrızm mınıstri Sýn Elı, qos eldiń dıplomatııalyq ókilderi men shyǵarmashylyq qaýym ókilderi qatysty.
Ortalyqtyń ashylýy – uzaqmerzimdi dıplomatııalyq yntymaqtastyq pen kelisimniń jemisti nátıjesi. 2022 jyly Qytaı Halyq Respýblıkasy Tóraǵasynyń Astanaǵa memlekettik sapary aıasynda Qasym-Jomart Toqaev pen Sı Szınpın Qytaı men Qazaqstanda teń negizde mádenı ortalyqtar qurý jóninde kelisimge kelgen bolatyn.
Bıyl Aqtaý qalasy «Túrki áleminiń mádenı astanasy» mártebesine ıe boldy. Bishkekte Muhtar Áýezov pen Shyńǵys Aıtmatovqa arnalǵan «Dostyqtyń altyn kópiri» eskertkishi ashyldy, al Túrkistan qalasynyń erekshe mártebesin aıqyndaıtyn zań qabyldandy.
Mádenı salada sıfrlyq tehnologııalar keńinen engizilip otyr. 275 mýzeı men 65 myńnan astam eksponat qamtylǵan E-Museum vırtýaldy júıesi iske qosylyp, 3D formattaǵy artefaktilerdi sıfrly túrde tamashalaý múmkindigi paıda boldy.
QR Mádenıet jáne aqparat mınıstrliginiń bes jyldyq júıeli eńbegi nátıjesinde Qazaqstan óneri halyqaralyq sahnada jarqyrap, ulttyq mádenıet zamanaýı baǵyttarmen úndesip damı tústi. Búginde Qazaqstan Ortalyq Azııadaǵy mádenı kóshbasshy ári ulttyq rýh pen ınnovasııany úılestire bilgen memleket retinde tanylyp otyr.