Manhettenniń qarjy ortalyǵynda QR Respýblıka kúnine arnalǵan Memlekettik týdy kóterý rásimi ótip, Nıý-Iork merııasy bul kúndi resmı túrde «Qazaqstan murasy kúni» dep jarııalady, dep habarlaıdy Egemen.kz.
Saltanatty sharaǵa Nıý-Iork merııasynyń, dıplomatııalyq korpýs ókilderiniń, BUU janyndaǵy Qazaqstannyń Turaqty ókildigi men Nıý-Iork qalasyndaǵy QR Bas konsýldyǵynyń qyzmetkerleri, sondaı-aq qazaqstandyq dıaspora men jastar ókilderi qatysty.
Bıylǵy is-sharanyń aıryqsha sáti – Nıý-Iork meri Erık Adams atynan qol qoıylǵan jáne QR Respýblıka kúnine oraı «Qazaqstan murasy kúni» (Kazakhstan Heritage Day) dep jarııalanǵan resmı proklamasııanyń tabystalýy boldy. Bul qujat Qazaqstanǵa degen qurmet pen qazaqstandyq qaýymdastyqtyń qalanyń mádenı jáne qoǵamdyq ómirine qosqan úlesin moıyndaýdyń kórinisi retinde qabyldandy.
«Proklamasııa Qazaqstan men Amerıka Qurama Shtattary arasyndaǵy dostyq baılanystardyń beriktigin aıǵaqtap, Nıý-Iork qalasynyń ózara qurmet pen halyqaralyq seriktestik qaǵıdattaryna adaldyǵyn bildirdi. Qala ákimshiligi atynan quttyqtaý sóz sóılegen Halyqaralyq ister jónindegi arnaıy keńesshi Charlz Daımond dıasporanyń mádenıetaralyq dıalogty damytýǵa qosqan úlesin atap ótip, Nıý-Iork pen Qazaqstan arasyndaǵy yntymaqtastyqty odan ári tereńdetýge qoldaý bildirdi», dep habarlady Qazaqstan Respýblıkasynyń Nıý-Iork (AQSh) qalasyndaǵy Bas konsýldyǵy.
Sharada AQSh-ta turatyn qazaqstandyqtardyń eldiń halyqaralyq ımıdjin qalyptastyrýdaǵy róline nazar aýdaryldy. «Sony» kompanııasynyń aǵa vıse-prezıdenti Galııa Tleýova sheteldegi jas mamandardyń jetistikteri Qazaqstannyń jańǵyrý baǵytynyń jalǵasy ekenin atap ótti.
Nıý-Iork kınoakademııasynyń aǵa vıse-prezıdenti Devıd Klaın mádenı jáne bilim berý salasyndaǵy seriktestikti damytýǵa nıet bildirip, Almatydaǵy Akademııanyń jańa kampýsy týraly aıtyp ótti.
Saltanatty keshtiń mádenı baǵdarlamasynda amerıkalyq mýzykant Djeff Gersh qazaqtyń ulttyq aspaby – dombyramen dástúrli týyndylar oryndap, erekshe áser qaldyrdy. Sondaı-aq «Viva Music Carnegie Hall – 2022» baıqaýynyń jeńimpazy Gúlzar Gabman qazaq ánderin oryndap, keshtiń rýhyn asqaqtatty.
QR Nıý-Iork qalasyndaǵy Bas konsýly Raýan Tleýlın Nıý-Iork merııasyna rızashylyǵyn bildirip, proklamasııanyń tabystalýy Qazaqstan men AQSh arasyndaǵy dostyq pen ózara qurmettiń mańyzdy nyshany ekenin atap ótti.