Kókshetaý qalasynda Ulttyq ulannyń «Ortalyq» óńirlik qolbasshylyǵyna qarasty 5510 áskerı bóliminde jańa zamanaýı kazarma paıdalanýǵa berildi, dep jazady Egemen.kz.
Saltanatty is-sharaǵa Ishki ister mınıstriniń orynbasary, Ulttyq ulannyń Bas qolbasshysy general-maıor Ańsaǵan Baltabekov pen Aqmola oblysynyń ákimi Marat Ahmetjanov qatysty.
Ulttyq ulannyń resmı ókili Álibek Ábdilovtyń aıtýynsha, jańa nysannyń ashylýy — memlekettiń quqyqtyq tártipti nyǵaıtýǵa, azamattardyń qaýipsizdigin qamtamasyz etýge ári áskerı qyzmetshilerge jaıly jaǵdaı jasaýǵa baǵyttalǵan «Zań jáne tártip» tujyrymdamasynyń naqty nátıjesi.
Jańa kazarma bir batalonǵa arnalǵan jáne qazirgi zaman talaptaryna tolyq saı jabdyqtalǵan. Munda demalý, oqý, sportpen aınalysý jáne psıhologııalyq qoldaý alý úshin barlyq jaǵdaı jasalǵan.
Ǵımarat Aqmola oblysy ákimdiginiń qoldaýymen salyndy. Bul óńir ákimdigi men Ulttyq ulan arasyndaǵy áleýmettik jáne ınfraqurylymdyq máselelerdi sheshýdegi ózara tyǵyz yntymaqtastyqtyń jemisi.
Kazarmada áskerı qyzmetshilerdiń dene daıyndyǵyn arttyrýǵa arnalǵan zamanaýı sport zaly bar. Sondaı-aq oqý bólmelerinde ınteraktıvti taqtalar, LED ekrandar jáne psıhologııalyq qoldaý aımaqtary ornatylǵan. Munyń bári oqý úderisiniń sapasyn arttyryp, tártipti kúsheıtedi.
5510 áskerı bólimi aımaqtyń qoǵamdyq tártibi men tynyshtyǵyn qamtamasyz etýde mańyzdy ról atqarady. Bul baǵyttaǵy jumystardy jergilikti bılik pen Ulttyq ulannyń ózara qoldaýy odan ári nyǵaıtyp otyr.
Jańa kazarma ulandyqtardyń qyzmet jaǵdaıyn jaqsartyp qana qoımaı, el tynyshtyǵyn kúzetken jaýyngerlerge rýh pen senim beredi.