Respýblıka kúni merekesi qarsańynda Munaıly aýdanynyń Aıraqty eldi mekeninde Memleket basshysy Qasym-Jomart Toqaevtyń bastamasymen júzege asyrylyp jatqan «Keleshek mektepteri» ulttyq jobasy aıasynda №21 jalpy bilim beretin mekteptiń saltanatty ashylýy ótti. Bul – Mańǵystaý oblysynda atalǵan baǵdarlama boıynsha paıdalanýǵa berilgen on birinshi mektep, dep habarlaıdy Egemen.kz.
Jańa bilim ordasy 900 oqýshyǵa arnalǵan. Saltanatty sharaǵa Mańǵystaý oblysynyń ákimi Nurdáýlet Qılybaı qatysyp, ustazdar men oqýshylardy jańa bilim oshaǵynyń ashylýymen quttyqtady.
-Memleket basshysy Qasym-Jomart Toqaevtyń bastamasymen júzege asyp jatqan «Keleshek mektepteri» ulttyq jobasy – elimizdegi bilim sapasyn arttyrýǵa baǵyttalǵan mańyzdy qadam. Zamanaýı mektepterdiń ashylýy qala men aýyl arasyndaǵy alshaqtyqty azaıtyp, balalardyń áleýetin ashýǵa jáne básekege qabiletti urpaq qalyptastyrýǵa múmkindik beredi. Búgingi mekteptiń ashylýy – Munaıly aýdany turǵyndary úshin úlken qýanysh ári óńirdiń áleýmettik damýyna qosylǵan eleýli úles, - dedi aımaq basshysy.
Jalpy aýdany 9 myń sharshy metrden asatyn zamanaýı mektepte 45 oqý kabıneti bar. Olardyń qatarynda dızaın jáne tehnologııa, tamaqtaný mádenıeti, vızýaldy óner, úı mádenıeti, robototehnıka, STEM jáne mýzyka kabınetteri qamtylǵan. Bilim ordasy oqýshylardyń jan-jaqty damýyna jáne shyǵarmashylyq qabiletterin ashýǵa qajetti barlyq jabdyqtarmen qamtamasyz etilgen. Erekshe bilimdi qajet etetin balalar úshin sensorlyq bólme, ınklıýzıvti bilim berýdi qoldaý kabıneti jáne arnaıy jedelsaty ornatylǵan. Oqýshylardyń qaýipsizdigin qamtamasyz etý maqsatynda ǵımarat tolyqtaı beınebaqylaý júıesimen jabdyqtalǵan, aýmaǵynda oıyn jáne sport alańdary salynǵan.
Buǵan deıin óńirde ulttyq «Keleshek mektepteri» jobasy aıasynda 9 myńnan astam oqýshyǵa arnalǵan 10 mektep ashylǵan bolatyn. Bıylǵy jyldyń sońyna deıin Aqtaý men Jańaózen qalalarynda taǵy eki jańa mektepti paıdalanýǵa berý josparlanyp otyr.