Naýqastar qazir Arqalyq, Torǵaı, Qostanaı aýrýhanalarynda jatyr. Áleýmettik jelide aýrýhanada oryn jetpeı jatyr degen aqparat taraǵan. Alaıda muny oblystyq densaýlyq saqtaý basqarmasy joqqa shyǵardy. Sanıtarlyq-epıdemııalogııalyq qyzmet mamandary toı bolǵan dámhanany tekserip jatyr. Al polısııa QR Qylmystyq kodeksiniń 304 baby boıynsha is qozǵady, dep habarlaıdy Egemen.kz.
Oblystyq densaýlyq saqtaý basqarmasynyń málimetinshe, 20 qazanda Arqalyq qalasynyń, Jangeldın aýdandyq aýrýhanasyna, oblystyq aýrýhanaǵa azyq-túlikten ýlaný dıagnozymen naýqastar júgindi. Naýqastarda ishtiń ótýi, dene qyzýynyń kóterilýi, jalpy álsizdik belgileri bolǵan.
Olardyń bári der kezinde Qostanaı oblystyq aýrýhanasyna, Arqalyq qalasy men Jangeldın aýdandyq aýrýhanalaryna jatqyzyldy. Jangeldın aýdanynda 27, Arqalyqta 52, oblystyq aýrýhanada 6, barlyǵy 85 naýqas emdelip jatyr. Qazir jaǵdaılary qanaǵattanarlyq. Oblystyq densaýlyq saqtaý basqarmasynyń basshysy, sanıtarlyq avıasııa jelisi arqyly juqpaly aýrýlar dárigerleri, terapevt, pedıator mamandar brıgadasy Torǵaı óńirinde júr.
Oblystyq sanıtarlyq-epıdemııalogııalyq baqylaý departamenti juqpaly aýrýǵa qarsy qajetti sanıtarlyq is-sharalardyń bári atqarylyp jatqanyn aıtty.
«Tergeý bastaldy. Dámhanadaǵy tamaq ónimderinen, aýyz sýdan, shaıyndylardan synama alynyp, mıkrobıologııalyq zertteýge jiberildi. Tergeý barysynda qoǵamdyq tamaqtandyrý ornynyń kúndelikti jumys istemeıtini, tek bankettik is-sharalar ótkizetini anyqtaldy. Qostanaı oblysynyń bas memlekettik sanıtarlyq dárigeri nysan qyzmetin toqtata turý, sondaı-aq onyń qyzmetkerlerin jumystan ýaqytsha shettetý týraly qaýly shyǵardy. Jappaı ýlaný deregi boıynsha Arqalyq qalasynyń ákimdigi men quqyq qorǵaý organdaryna habarlama joldandy. Polısııa basqarmasy Qazaqstan Respýblıkasy Qylmystyq kodeksiniń 304-babynyń 1-bóligi boıynsha qylmystyq is qozǵady. Tergeý júrip jatyr. Onyń nátıjesi qosymsha habarlanatyn bolady», dedi oblystyq sanıtarlyq-epıdemıologııalyq baqylaý departamenti basshysynyń orynbasary Gúlim Dosymova.
Qostanaı oblysy