Elordadaǵy «Astana Opera» teatrynda Mádenıet jáne aqparat mınıstri Aıda Balaeva halyqaralyq baıqaýlardyń jeńimpazdarymen kezdesý ótkizdi.
Olardyń qatarynda Ámire atymen tanylǵan ánshi Ernar Sadyrbaı, halyqaralyq dodalarda top jarǵan Erjan Maksım, bıylǵy «Slavıan bazary» baıqaýynyń Gran-prı ıegeri Almagúl Battalıeva sekildi tanymal ónerpazdar bar. Kezdesý barysynda birshama másele talqylanyp, ónerdiń keshegisi men búgini tóńireginde áńgime qozǵaldy.
– Búgin mereke qarsańynda el mádenıetiniń damýyna úles qosyp júrgen jastarmen kezdesip otyrmyz. Sizderdiń halyqaralyq deńgeıdegi jetistikterińiz — elimizdiń abyroıy men bedeli. Ár ónerpazdyń eńbegi men darynyn joǵary baǵalaımyn. El men jerge, óz isine degen súıispenshilik osyndaı jeńiske jeteleıdi. Sizderdi tárbıelegen ata-analaryńyz ben ustazdaryńyzǵa alǵys bildiremin. О́ıtkeni olardyń sizderdi ónerge baýlyp, tańdaýlaryńyzdy qoldaýda eńbegi zor, – dedi Aıda Ǵalymqyzy.
Is-sharaǵa úzdik opera ánshileri, sheteldegi baıqaýlarda tanylyp júrgen dombyrashylar men bıshiler qatysty. Sonyń biri – Italııada ótken halyqaralyq opera baıqaýynyń jeńimpazy, 70-ten astam álemdik baıqaýda el namysyn qorǵaǵan opera ánshisi Áıgerim Altynbek.
– Allaǵa shúkir, osyndaı keremet jetistikterge jetip, ónerimizdi shyńdap kelemiz. О́zimdi ustazdan joly bolǵan adam dep esepteımin. Ýnıversıtet qabyrǵasynda bolsyn, kolledjde bolsyn bilikti ustazdardan sabaq aldyq. О́nerpazdyń ata-anasy, ósken ortasy, jaqsy ustazdary qabysqanda ǵana tolyqqandy tulǵa shyǵady dep oılaımyn. Osylaı ónerimiz arqyly elimizdi álemge tanytyp, asqaq bıikterdi baǵyndyryp, alǵa qaryshtaı bereıik, – dedi Á.Altynbek.
Is-sharada ónerdegi búgingi máseleler men talap-tilekter aıtyldy.
– Keıde toılarǵa barǵan kezde eski ánder de shyrqalady. Qarapaıym halyq solardy ábden tyńdap úırengen. Opera dese, Brýsılovskııdiń muralary eske túsedi. Qazir bárimiz aıtatyndaı jańa ánderdi tabý qıyn. Máselen, Eskendir aǵamyzdyń «Atamekenindeı» jalpy halyqqa belgili ári eskirmeıtin án shyǵarýymyz kerek. Osynshama keńistikti ıgere alǵan babalarymyzdyń ulttyq ónerine súıenip, bolashaqtyń kádesine jaraıtyndaı zamanaýı dúnıeler týdyrýymyz kerek.
Alpaýyt demesek te, halyqaralyq deńgeıde bedeli bar el boldyq. Nurǵısa aǵamyzdyń ǵajaıyp kúılerin qaıta-qaıta aıtamyz, biraq bizge búgin jańa Nurǵısalar qajet. Elimizdiń ónerin baıytyp, elge sińetin jańa dúnıeler týdyrsaq, sol jetistigimiz, – dedi mınıstr Aıda Ǵalymqyzy.
Alqaly otyrystan soń ónerpazdar arnaıy alǵyshatpen marapattalyp, estelik sýretke tústi.