Ulan aýdanynda bıyl 52 shaqyrym jol men kóshe jóndelip jatyr. Ol týraly oblys ákimi Nurymbet Saqtaǵanov Ulan aýdanynyń halqymen kezdesýde aıtty. Aýdanǵa jumys saparymen barǵan óńir basshysy kezdesýden keıin birqatar áleýmettik nysandy aralady.
– Ulan aýdanynyń agroónerkásiptik keshende, ónerkásipte, týrızm salasynda damý múmkindikteri zor. Aýdannyń 2029 jylǵa deıingi damý josparyna sáıkes, 15,8 mlrd teńge bıýdjet qarajatyn, 357,9 mlrd teńge jeke ınvestısııa tartý josparlanǵan. Búginde jalpy quny 8,8 mlrd teńgeni quraıtyn jylý oqshaýlaǵysh materıaldar zaýytynyń qurylysy júrgizilip jatyr, – dep málimdedi oblys ákimi.
Turǵyndar óz kezeginde respýblıkalyq mańyzy bar joldan Mıtrofanovka aýylyna deıingi joldy, Proletarka aýyly ishindegi joldardy jóndeý kerektigin alǵa tartty. Oblys ákiminiń aıtýynsha, Mıtrofanovka aýylyna kireberis joldy 484,9 mln teńgege ortasha jóndeýge, Proletarka aýyly ishindegi joldardy 154 mln teńgege jóndeýge smetalyq qujattama ázirlengen. Jobalar kelesi jyly júzege asady. Sondaı-aq halyq Dýbyǵaly kóline deıin aparatyn joldyń joqtyǵyn aıtty.
– Atalǵan kóldiń týrıstik áleýeti joǵary. Alaıda Gagarıno aýyly arqyly ótetin joldyń joqtyǵy ishki týrızmniń damýyn shektep, aımaqtyń ınvestısııalyq tartymdylyǵyn tómendetedi. Máseleni sheshý maqsatynda Dýbyǵaly kóline aparatyn jol aýdandyq mańyzy bar joldar tizimine engizildi, – dedi N.Saqtaǵanov.
Aýdan jurtshylyǵy ózderin tolǵandyrǵan basqa da saýaldaryn qoıyp, naqty jaýap aldy. Keleli kezdesýden keıin oblys ákimi Sartovka aýylyndaǵy Shyǵys Qazaqstan kópsalaly kolledjine bardy. 1945 jyly qurylǵan kolledj stýdentterdi aýyl sharýashylyǵy, tehnıka salasy, IT baǵyttary boıynsha toǵyz mamandyqqa oqytady. Bilim ordasyndaǵy 424 stýdenttiń 73-i dýaldy oqytý júıesi arqyly teorııany óndiristik tájirıbemen ushtastyryp júr. Kolledjdiń 1973 jyly salynǵan jataqhanasynda 192 stýdent turady. Olardyń ishinde Almaty, Jambyl oblystarynan, Shymkent, Túrkistan, Semeı, Qaraǵandy qalalarynan kelgender de bar.
Ulan aýdanynda bilimnen bólek sportqa da jiti kóńil bólinip otyr. Osy kúni Tavrııa aýylynda zamanaýı dene shynyqtyrý-saýyqtyrý kesheni ashyldy.
– Bul keshen aýylǵa tyń tynys berip, jańa ómir saltynyń bastaýyna aınalady dep senemiz. Osyndaı nysandar aýyl jastarynyń densaýlyǵyn nyǵaıtyp qana qoımaı, olardyń boıynda tabandylyq pen jeńiske degen senim qalyptastyrady. Bıyl óńirde osyndaı 3 keshen paıdalanýǵa beriledi, – dedi oblys ákimi.
Keshenniń jalpy alańy 1 284,2 sharshy metr. Onda sporttyq-saýyqtyrý is-sharalary, boks, kúres, aýyr atletıka jarystaryn ótkizýge bolady. Ǵımarat ishinde zamanaýı jattyǵý zaldary, kıim aýystyratyn bólmeler, sanıtarlyq toraptar, medısınalyq pýnkt, qural-jabdyq saqtaıtyn bólmeler bar.
Tavrııa aýylyndaǵy qýattylyǵy 5,4 MVt jańa ortalyq qazandyq ta áleýmettik nysandar men turǵyn úılerdi ortalyqtandyrylǵan jylýmen qamtamasyz etýge baǵyttalǵan. Oblys ákimi Nurymbet Saqtaǵanov qazandyq jumysymen de tanysty. Jobany «Tereze» JShS merdiger kompanııasy júzege asyryp jatyr. Qarjy respýblıkalyq, oblystyq bıýdjetterden, Ulttyq qordan bólingen. Joba qujattamasyna sáıkes, qazandyqqa jalpy jylý júktemesi 2,801 MVt bolatyn 16 nysandy qosý josparlanǵan. Bıylǵy jylytý maýsymynda balabaqsha, mektep, aýrýhana, ákimdik ǵımarattary qosyldy. Mádenıet úıi, sporttyq-saýyqtyrý kesheni, meshit, «ShQO-HOSPIS» mekemesi, dúkender men kópqabatty turǵyn úılerdi qosý kezeń-kezeńimen júrgizilip jatyr.
Ulan aýdanynyń tumsa tabıǵaty týrızmdi damytýǵa suranyp turǵan, geografııalyq orny óńirdiń áleýetin arttyrýǵa taptyrmas jer. Toǵyz joldyń torabynda jatqan jer ózen-kólge, orman-toǵaıǵa óte baı. Ilkimdi isterimen batyl alǵa basyp kele jatqan óndiris oshaqtary da az emes. Osynyń bári bas quraı kelip, aýdannyń damý barysy qarqynǵa qarqyn qosa beredi degenge kámil sendiredi.
Shyǵys Qazaqstan oblysy,
Ulan aýdany