Mańǵystaý oblysynda «Taza Qazaqstan» ekologııalyq aksııasy aıasynda jańa aýqymdy áleýmettik-ekologııalyq joba – «Taza Mańǵystaý» taqyrybymen 45 kúndik chellendj ótip jatyr.
Is-shara barysynda tazalyq, abattandyrý baǵytyndaǵy jumys jalǵasyn tabady. Aqtaý qalasynda «Mangistau Energo Munay» JShS «1 adam – 5 aǵash» ekologııalyq estafetasyn bastady. О́ńirdiń orman qoryn kóbeıtip, qoǵamda ekologııalyq mádenıetti qalyptastyrý maqsatyndaǵy aksııaǵa kompanııanyń 40-qa jýyq qyzmetkeri qatysyp, jergilikti klımatqa beıimdelgen akasııa, vıaz, qaraaǵash, safora aǵashtaryn ekti. Alǵashqy kezeńde olar «Prezıdent parki» aýmaǵyna 100 túp aǵash otyrǵyzdy.
– Bul bastama tek bir kúndik is-shara emes, biz ony turaqty dástúrge aınaldyrýdy kózdep otyrmyz. Estafetany ózge mekemelerge joldap, Aqtaýdyń ár aımaǵynda aǵash egý isin jalǵastyramyz. Jalpy, saıabaq aýmaǵynda, Qalamqas, Jetibaı ýchaskeleriniń aınalasynda 1 000 túp aǵash otyrǵyzý josparlanǵan, – dedi «Mangistau Energo Munay» JShS bas dırektorynyń óndiris jónindegi orynbasary Qýanbek Bıǵalıev.
Jańaózen qalasyna qarasty Teńge aýylynda da qorshaǵan ortany qorǵaý, kógaldandyrý baǵytyndaǵy jumys júıeli júzege asyp jatyr. Táýelsizdik alańy saıabaǵynda 30-ǵa jýyq aǵash kósheti otyrǵyzyldy, «TengeOilGas» JShS-nyń demeýshiligimen Teńge aýyly aýmaǵynda aǵash egýge uzyndyǵy 500 metr jer belgilendi. Aldaǵy ýaqytta bul jerge seriktestik eki qatar aǵash kóshetterin otyrǵyzady.
– Shara aýyldyń ekologııalyq ahýalyn jaqsartyp, turǵyndarǵa taza ári jaıly orta qalyptastyrýǵa baǵyttalǵan, – deıdi Teńge aýylynyń ákimi J.Agısov.
Mańǵystaý oblysy