Qazaqstan Ishki ister mınıstrligi elde alaıaqtyqtyń jańa túri paıda bolǵanyn habarlap, turǵyndardy saq bolýǵa shaqyrdy, dep jazady Egemen.kz.
Mınıstrliktiń málimetinshe, qazir ózderin Qarjy mınıstrliginiń qyzmetkeri retinde tanystyratyn alaıaqtar kóbeıgen. Olar azamattarǵa qońyraý shalyp, «deklarasııa tapsyrý merzimi ótip ketti» dep qorqytady jáne «esepshottaryńyz buǵattalady» dep sendiredi. Keıin máseleni «úsh kún ishinde sheshýge kómektesemiz» dep ýáde berip, telefonǵa kelgen SMS-kodty aıtýyn suraıdy.
Alaıda azamat sms-kodty aıtqan sátte, alaıaqtar onyń bank shotyna kirip, aqshasyn ıemdenip alady.
IIM turǵyndarǵa resmı mekemeler eshqashan sms-kod nemese jeke derekterdi suramaıtynyn, sondaı-aq «máseleni sheship beremiz» degen ýádelerdiń alaıaqtyq áreket ekenin eskertti.