Aqmola oblysy, Selınograd aýdanyna qarasty Qabanbaı batyr aýylynda byltyr ashylǵan jańa úlgidegi jaıly mektep búginde aýyl ómirine tyń serpin ákeldi. Prezıdent Qasym-Jomart Toqaevtyń bastamasymen júzege asyp jatqan «Keleshek mektepteri» ulttyq jobasy aıasynda boı kótergen bul bilim ordasy búginde sapaly bilim men jańa formattaǵy tárbıe berý isiniń tiregine aınalyp otyr, dep jazady Egemen.kz.
Aýyl turǵyndary úshin jańa mekteptiń salynýy kópten kútken qýanysh boldy. Zamanaýı talaptarǵa saı salynǵan mektepte tolyq jaraqtandyrylǵan hımııa, fızıka,bıologııa kabınetteriniń zerthanalary, 2 sportzal, STEM zerthanasy, medıatekaly kitaphana, ashana, medısınalyq bólme jáne horeografııalyq zal bar. Munda tek oqý ǵana emes, balanyń jan-jaqty qabiletin shyńdaý basty nazarda.
Mektep dırektory Jahın Rústem Janataıulynyń aıtýynsha, jańa mekteptiń basty ereksheligi – onyń zamanaýı materıaldyq bazasy men oqýshyǵa arnalǵan jaıly ortasy.
«Eski mekteppen salystyrǵanda eń basty aıyrmashylyq – materıaldyq bazasynda. Balalardyń sapaly bilim alýy úshin barlyq múmkindik jasalǵan. Zerthanalar, robototehnıka kabıneti, STEM-zona, medıatekaly kitaphana – bári bar. Bıylǵy oqý jylynda mektepte 887 oqýshy bilim alyp jatyr, 83 muǵalim eńbek etedi. Byltyr alǵash ashylǵan kezde 901 oqýshy, 79 muǵalim bolǵan. Oqýshylardyń qyzyǵýshylyǵyn arttyrý úshin ártúrli úıirmeler uıymdastyrylǵan: horeografııa, vokal, robototehnıka, dombyra, sheber qoldar jáne sporttyq seksııalar – voleıbol, fýtbol, basketbol, toǵyzqumalaq, asyq atý, ústel tennısi bar. Muǵalimderdiń kásibı damýy úshin qolaıly jaǵdaılar jasalǵan. «О́rleý» kásibı biliktilikti arttyrý ortalyǵy tarapynan onlaın túrde bazalyq kýrsten mektep ustazdary tolyq ótip jatyr. Qazirgi ýaqytta jasandy ıntellekt kýrstaryn oqyp jatyr. Ádistemelik otyrystarda jańa oqytý tehnologııalaryn taldap, tıimdisin qoldaný usynylady.Sonymen qatar ár muǵalimniń ózindik bilim deńgeıin kóterýge tolyq múmkinshilikteri bar. Mekteptiń barlyq kabınetterinde ǵalamtorǵa qosylǵan kompıýterler men noýtbýkter bar», deıdi mektep basshysy.
Jańa mekteptiń ashylýy aýyl ómirine de oń áserin tıgizgen. Keı ata-analar balalarynyń osy mektepte oqýyn qalaǵandyqtan, aýylǵa kóshýge sheshim qabyldapty.
Jalpy, balanyń mektep ómirine beıimdelýi, oqýǵa qyzyǵýshylyǵy men óz-ózine senimdiligi eń aldymen bastaýysh býynda qalyptasady. Bul rette bastaýysh synyp muǵalimi Ýtenova Aksaýle Kýmekovna jańa mekteptiń balanyń psıhologııalyq jáne shyǵarmashylyq damýyna zor yqpal etkenin aıtady.
«Prezıdentimiz Qasym-Jomart Toqaevtyń bastamasymen qolǵa alynǵan «Keleshek mektepteri» jobasy aýyl balalaryna úlken múmkindik syılady. Jyly túspen bezendirilgen synyptar, demalys aımaqtary men oıyn keńistikteri balanyń kóńil kúıine jaqsy áser etedi. Buryn mektepke alǵash kelgen balalarda azdap qorqynysh bolsa, qazir olar mektepke qýana keledi. Mundaı orta olardyń qııalyn, oılaý qabiletin damytady. Oqýshylarym sabaqqa qyzyǵýshylyqpen qatysyp, óz oıyn erkin aıta alady», deıdi ustaz.
Muǵalim sabaqta oqýshylardyń logıkalyq jáne shyǵarmashylyq qabiletin damytý úshin «Mıǵa shabýyl», «Venn dıagrammasy», «Oılan-juptas-bólis» sııaqty ádisterdi jıi qoldanady. Onyń aıtýynsha, bul tásilder balanyń óz oıyn jetkizýge jáne ómirlik jaǵdaılardy saraptaýǵa kómektesedi.
«Internet, robototehnıka, zerthanalar, ınteraktıvti taqtalar – bári bar. Ata-analarmen baılanys ta jaqsy jolǵa qoıylǵan. «Men jáne meniń ata-anam», «Kúz hanshaıymy», «Kúzgi asar» sııaqty sharalar ata-analardyń mektep ómirine belsendi aralasýyna yqpal etedi. Sonymenqatar tárbıelik máni zor «Kóńildi úzilis», «О́negeli 15 mınýt», «Ulttyq oıyn- ult qazynasy» sııaqty is-sharalar, «Ushqyr oı alańy», «Balalar kitaphanasy», «Shabyt»jobalary únemi jumys jasaıdy. «Kúzgi asar» jármeńkesinde bastaýysh synyp oqýshylary kúzgi eginniń tabıǵı materıaldary men orman tabıǵatynyń syılaryn paıdalana otyryp, ata-analarmen birge jasaǵan qolóner buıymdarynan jármeńke ótkizedi. Bul is-sharaǵa bastaýysh synyp oqýshylary óte belsendi qatysady.Jasaǵan jumystary bir-birinen ótken, adam qııalyna shek keltirmeıtin keremet dúnıelerdi kórýge bolady», deıdi muǵalim.
Mektep dırektorynyń tárbıe isi jónindegi orynbasary, qazaq tili men ádebıeti pániniń muǵalimi Asanova Merýert Qýanyshqyzy da bul jobanyń muǵalimderge mol múmkindik bergenin atap ótti.
«Keleshek mektepteri» jobasy pán muǵalimderine zamanaýı oqý ortasynda jumys isteýge úlken jaǵdaı jasady. Keń ári jaryq kabınetter, jańa qurylǵylar men ınteraktıvti taqtalar sabaqtyń sapasyn arttyryp, oqýshynyń nazaryn ustap turýǵa kómektesedi. Sabaqta Quizizz, Kahoot sııaqty sıfrlyq platformalardy jıi paıdalanamyz. Bul oqýshylardyń sıfrlyq saýattylyǵyn arttyryp qana qoımaı, pánge degen qyzyǵýshylyǵyn arttyrady. Aýyl mektebiniń ózinde ǵylymı jobalarǵa qatysyp júrgen oqýshylar bar. Olardyń jetistikteri – aýyl balasynyń da úlken múmkindikterge ıe ekenin dáleldeıdi», deıdi Merýert Qýanyshqyzy.
Mektep ómirinde sporttyń alar orny da erekshe. 17 jyldan beri dene shynyqtyrý pániniń muǵalimi bolyp eńbek etip kele jatqan Bekıshev Jandos Nágizkenuly sporttyq ınfraqurylymnyń jaqsarýy aýyl balalarynyń sportqa degen qyzyǵýshylyǵyn arttyrǵanyn aıtady.
«Jańa mektep salynǵannan keıin sporttyq ınfraqurylym edáýir jaqsardy. Eki zamanaýı sportzal ashyldy, syrtta jasandy jabyndysy bar alań men júgirý jolaǵy salyndy. Sport jabdyqtary túgel jańartyldy. Iá, jaıly mektebimizde jaǵdaı jasalǵan soń oqýshylardyń sportqa degen qyzyǵýshylyǵy aıtarlyqtaı artty. Oqýshylar sabaqtan tys ýaqytta da sport zalǵa kelip jattyǵady. Ásirese fýtbol, voleıbol jáne ústel tennısi sekildi baǵyttarǵa qatysýshylar kóbeıdi. Ulttyq qundylyqtarymyzdy dáripteıtin toǵyzqumalaq, asyq atý, bes asyq sııaqty úıirmelerge oqýshylar qyzýǵyshylyqpen qatysady. Mektepte aptasyna birneshe ret ótetin turaqty sporttyq úıirmeler uıymdastyrylǵan. Muǵalimder aýdandyq jáne oblystyq jarystarǵa júıeli túrde qatysýǵa múmkindik beredi. Qazir erekshe damyp kele jatqan baǵyttar – toǵyzqumalaq, asyq atý, bes asyq,voleıbol,ústel tennısi jáne fýtbol.Sonymen qatar, jańa sport alańynyń arqasynda shańǵy tebýge jáne jeńil atletıkamen aınalysýǵa da jaǵdaı jasalǵan.Aýylymyzda sońǵy jyldary balalardyń sporttaǵy jetistikteri artyp keledi. Jergilikti deńgeıde aýdandyq jarystarda júlde alyp júrgen oqýshylar bar. Keıbireýi oblystyq quramalarǵa da shaqyrylǵan. Jaıly mektebimizde múmkindikter de kóbeıýde: jańa sport alańdary, seksııalardyń kóbeıýi jáne jattyqtyrýshylardyń tynbaı oqýshylardy daıyndaǵan eńbegi men belsendiligi áserin tıgizýde. Degenmen, aýyl balalary úshin eń basty yntalandyrý kózi – qoldaý men durys baǵyt-baǵdar berý», deıdi ustaz.
Al alǵashqy áskerı daıyndyq pániniń jetekshisi Seılhanov Gallıam Serikbaıuly zeınetten keıingi ómirin bolashaq Otan qorǵaýshylardy tárbıeleýge arnap otyr.
«Áskerı salada 34 jyl qyzmet etip, tájirıbemdi endi jas urpaqqa jetkizip júrmin. Jańa mektepte arnaıy bólme men jabdyqtalǵan keńistik bolǵandyqtan, AÁD sabaǵynyń formaty teorııadan praktıkaǵa aýysty. Buryn tek kabınette túsindiriletin bólimder qazir TIR bólmesinde pnevmatıalyq vıntovkadan atý jáne trenajerlar men maketter arqyly kórsetilip, oqýshylar is-áreketpen meńgeredi. Sondaı-aq qaýipsizdik talaptary jaqsy saqtalǵan. Tek qana dáris pen jattandy urannan bólekmektebimizde jaıly jańa mekteptiń ashylǵanymen qatar mektep ishinde: «Aıbyn» patrıottyq klýby ashylyp, bolashaq Otan qorǵaýshylar retinde jasóspirimderdi patrıottyq sezimge Otanǵa degen súıispenshilikterin arttyrý maqsatynda Elimizdiń Týyn Memleket deńgeıindegi merekelerde arnaıy «Tý toby» qurylyp, saltannatty rásimde oryndaý saltqa aınaldy. Bul da Otanǵa degen súıispenshilik sezimdi oıatady dep senemin. Sonymen qatar ardagerlermen jáne áskerı qyzmetkerlermen kezdesýler, derekti fılmder, ınteraktıv kartalar, sıfrlyq resýrstar, jobalyq jumys, batyrlar ómirin zertteý, áskerı tarıh boıynsha mını-zertteýler, pikirtalas kezdesýler jıi ótkiziledi. Bul tásilder oqýshyǵa patrıotızmdi «tyńdap qoıý» emes, túsiný jáne seziný arqyly qabyldatýǵa yqpal etedi.Alǵashqy kómek pen qorǵanysqa arnalǵan maketter, stendter jáne qajetti oqý quraldary tolyǵymen qamtamasyz etilgen. Negizi osy kúnge deıin keıbir eski mektepterde burynǵy Keńes úkimeti kezinen qalǵan oqý materıaldyq quraldaryn qoldanyp jatsa, jaıly mektebimizde jańa kerekti oqý materıaldyq bazalarymen tolyq qamtamasyz etilgen. Árıne bul úlken jetistik jáne AÁD sabaǵyn joǵary dárejede ótkizýge úlken múmkindik beredi», deıdi ol.
Aýyl mektebindegi ózgeris tek ǵımarattyń jańarýy nemese jańa partalar men qural-jabdyqtardyń ornatylýy emes, bul oqý-tárbıe úderisiniń jańa deńgeıge kóterilýi. Qabanbaı batyr aýylyndaǵy mekteptiń ujymy bilim men tárbıeni ushtastyra otyryp, jas urpaqty eńbekqorlyqqa, jaýapkershilikke jáne otansúıgishtikke baýlyp otyr. Ár pán muǵaliminiń tájirıbesi men jańashyldyǵy osy istiń tabysty júrýine jol ashqan. Dene shynyqtyrý men alǵashqy áskerı daıyndyq sabaqtarynda oqýshylardyń erik-jigeri shyńdalyp, patrıottyq rýhy qalyptasqan. Al oqý kabınetterindegi jańa tehnologııalar balalardy ǵylym men izdeniske jeteleıdi. Jaıly, jaryq ári qaýipsiz mektep qabyrǵasynda ósip kele jatqan jas urpaq elimizdiń eńsesin tikteıtin, rýhy bıik, bilimdi azamat bolary sózsiz.