Kitap – aqyl men bilimniń qaınar kózi. Astanada Respýblıka kúni qarsańynda jańa kitaphana ashyldy. Saltanatty ashylý rásimine Astana qalasy máslıhatynyń tóraǵasy Tabıǵat Zeınulqabden, máslıhat depýtattary, sondaı-aq mádenıet salasynyń ókilderi qatysty. Kitaphana Astana qalasy ákimdiginiń ortalyqtandyrylǵan kitaphanalar júıesine qaraıdy.
Kórki kóz tartatyn jańa kitaphananyń zamanaýı oqý zaly men kovorkıngi, 3 myńnan astam kitap qory bar. Bir ýaqytta alty myń oqyrmanǵa qyzmet kórsete alady. Ýnıversıtet pen mektepke, «Egemen Qazaqstan» gazetiniń redaksııasyna jaqyn ornalasqan bul kitaphanaǵa kelýshiler qarasy óte kóp. Stıli de bólek, keń əri zamanaýı úlgide salynǵan. Eń bastysy, oqyrmanǵa barlyq jaǵdaı jasalǵan, kitapty úıge alyp oqýǵa da bolady. Jańa nysannyń ishki dızaıny da janǵa jylylyq, mıǵa tynyshtyq syılaıdy.
«Kreatıvti kitaphana dep atap otyrǵanymyz beker emes. О́ıtkeni keleshekte kitaphanalar men kreatıvti ındýstrııa ókilderi arasynda baılanys ornatyp, kitaphana keńistigin zııatkerlik platformaǵa aınaldyrsaq degen oıdamyz. Sonymen qatar munda oqý zaly, art-sheberhanasy, pikirtalas alańy, shyǵarmashylyq sheberhanalar sııaqty fýnksıonaldyq aımaqtar jumys isteıdi», deıdi Astana qalasy «Ortalyqtandyrylǵan kitaphanalar júıesiniń» basshysy Gúlbadan Mádibaeva.
Aıta keteıik, elordada kitaphana júıesin jańǵyrtý jumystary júıeli túrde júzege asyp jatyr. Naqtyraq aıtsaq, elordada 2023 jyly tórt kitaphana jóndeýden ótse, byltyr taǵy tórt nysan jańǵyrtylyp, tórt kitaphana paıdalanýǵa berildi. Al bıyl úsh kitaphana iske qosylyp otyr. Sóıtip, qazirgi ýaqytta Astana qalasynda 25 kitaphana jumys istep tur.