Djordj Vashıngton ýnıversıtetiniń ǵalymdary zár shyǵarý joldaryna ınfeksııa túsken árbir bes naýqastyń bireýi janýarlar ónimderi arqyly beriletin ishek taıaqshasynan (E. coli) zardap shekken degen qorytyndyǵa keldi. Zertteý nátıjesi mBio jýrnalynda jarııalandy, dep habarlaıdy Egemen.kz.
Ǵalymdar 5,7 myńnan astam E. coli bakterııasynyń úlgisin taldady. Olardyń bir bóligi ınfeksııa juqtyrǵan naýqastardan, al qalǵan bóligi et pen qus satatyn dúkenderden alyndy.
«Genetıkalyq taldaý zár shyǵarý joldary ınfeksııasynyń 18 paıyzǵa jýyǵy janýarlarda bolatyn bakterııalarmen baılanysty ekenin kórsetti. Qaýipti shtamdar kóbinese taýyq eti men kúrketaýyqta kezdesedi», - dep jazylǵan zertteýde.
Kedeı aýdandardyń turǵyndary arasynda ınfeksııa juqtyrý qaýpi edáýir joǵary boldy – olardyń E. coli juqtyrý yqtımaldyǵy baı aýdandardaǵy adamdarǵa qaraǵanda 60 paıyzǵa joǵary. Zertteýshiler muny sanıtarlyq jaǵdaıdyń nasharlyǵymen jáne sapaly taǵamǵa qol jetkizýdiń qıyndyǵymen baılanystyryp túsindirdi.
Zertteý avtorlary tutynýshylardy etti muqııat pisirýge, onyń pisirilgen taǵammen janasýyna jol bermeýge jáne pisirgennen keıin árqashan qoldy jýýǵa shaqyrdy.
Zár shyǵarý joldarynyń ınfeksııalaryna ýretrıt (nesep jolynyń qabynýy), sıstıt (qýyqtyń qabynýy) jáne pıelonefrıt (búırektiń qabynýy) jatady.
Zár shyǵarý joldarynyń qabynýyn ártúrli qozdyrǵysh – sańyraýqulaq, parazıt jáne vırýs týdyrýy múmkin. Degenmen kóp jaǵdaıda ınfeksııanyń paıda bolýyna bakterııalar sebep bolady.