Respýblıka kúninde elimizdiń birqatar óńirlerinde jańa bilim berý nysandary ashyldy. Bul týraly Oqý-aǵartý mınıstrligi habarlady, dep jazady Egemen.kz.
Jańa ǵımarattar Jambyl, Túrkistan, Mańǵystaý, Aqmola, Qaraǵandy, Batys Qazaqstan jáne Shyǵys Qazaqstan oblystary men Almaty qalasynda paıdalanýǵa berildi.
Tarqatyp aıtsaq, Almaty qalasynda birden tórt jańa formattaǵy mektep esigin aıqara ashty. Solardyń biri Medeý aýdanyndaǵy 2 myń oqýshy ornyna arnalǵan №220 mektep. Jańa ǵımarat óz mıkroaýdany boıynsha oqýshy orny tapshylyǵyn tolyq joıdy. Mektepte 83 oqý kabıneti, 4 sport zaly, kitaphana, ashana jáne kovorkıng aımaqtary bar.
Jambyl oblysynda Qarasý jáne Qarakemer aýyldarynda eki jańa mektep óz esigin aıqara ashty. Solardyń birinde 28 oqý kabıneti, konferens-zal, STEM-zerthanalar, robototehnıka kabıneti, kovorkıng ortalyǵy, sondaı-aq 3 sheberhana men 3 ǵylymı zerthana qarastyrylǵan.
Mańǵystaý oblysynyń Munaıly aýdanynda «Keleshek mektepteri» ulttyq jobasy aıasynda 900 oryndyq 11-shi mektep ashyldy. Onda 45 oqý kabıneti zamanaýı ınteraktıvti taqtalarmen jabdyqtalǵan.
Sondaı-aq Túrkistan oblysynyń Saýran aýdanynda mereke qarsańynda «Keleshek mektepteri» ulttyq jobasy sheńberinde №5 mektep paıdalanýǵa berildi. Mektepte jańa úlgidegi kabınetter, STEM-zerthanalar, 3 sheberhana, kovorkıng aımaqtary, demalys jáne oıyn alańdary, sporttyq zaldar, ashana, kitaphana jáne akt zaly bar. Qazirgi tańda óńirde alty mekteptiń qurylysy júrip jatyr.
Batys Qazaqstan oblysynyń Dostyq aýylynda 1200 oqýshyǵa arnalǵan jańa formattaǵy mektep ashyldy. Nysannyń paıdalanýǵa berilýimen apatty mektep máselesi sheshildi. Aıta keteıik, bul – óńirde ulttyq joba aıasynda salynǵan besinshi mektep.
Aqmola oblysynyń Kókshetaý qalasynda apatty ǵımarattyń ornyna salynǵan №10 jańa mekteptiń tehnıkalyq ashylýy ótti. Munda jaıly bilim alý úshin barlyq jaǵdaı jasalǵan: keń synyptar, zerthanalar, robototehnıka kabınetteri, zamanaýı sport jáne konferens-zaldar bar.
Qaraǵandy oblysynyń Jaryq aýylynda ulttyq joba aıasynda jańa mektep ashyldy. Munda STEM-zerthana, jaratylystaný-matematıka baǵytyndaǵy zamanaýı jabdyqtarmen jáne ádistemelik materıaldarmen qamtamasyz etilgen kabınetter, robototehnıka jáne grafıkalyq dızaın synyptary bar. Mektepte jasandy ıntellekt tehnologııasymen jabdyqtalǵan 22 ınteraktıvti taqta ornatylǵan.
Osyǵan qosa Shyǵys Qazaqstan oblysynyń Igilik aýylynda jergilikti bıýdjet esebinen salynǵan jańa mektep paıdalanýǵa berildi.
Aıta keteıik, 2025–2026 oqý jylynda elimizde jalpy 232 bilim berý uıymy salynady.