Memleket basshysy Qasym-Jomart Toqaev qylmystyq kiristerdi zańdastyrýǵa jáne terrorızmdi qarjylandyrýǵa qarsy kúres salasyndaǵy yntymaqtastyqty kúsheıtýge baǵyttalǵan zańǵa qol qoıdy.
Qujat «Qylmystyq jolmen alynǵan kiristerdi zańdastyrý (jylystatý) jáne terrorızmdi qarjylandyrý qaýip-qaterine baǵa beretin halyqaralyq ortalyqty qurý týraly kelisimdi ratıfıkasııalaý týraly» dep atalady.
Atalǵan zań halyqaralyq deńgeıde qarjylyq monıtorıng, terrorızm men uıymdasqan qylmysqa qarsy is-qımyl baǵytyndaǵy ózara árekettestikti kúsheıtýdi kózdeıdi. Kelisim aıasynda múshe elder kúdikti qarjy operasııalaryn anyqtaý jáne taldaý boıynsha birlesken baǵalaý júrgizedi.
Bul bastama elimizdiń qarjy júıesiniń ashyqtyǵyn arttyryp, halyqaralyq qaýipsizdik pen turaqtylyqty nyǵaıtýǵa úles qosady.