Kenııada sheteldik týrısterdi tasymaldaǵan Mombasa Air Safari kompanııasyna tıesili shaǵyn ushaq apatqa ushyrady. Agenttik málimetinshe, áýe apaty saldarynan ushaq bortynda bolǵan barlyq 11 adam qaza tapqan. Olardyń ishinde bir kenııalyq ushqysh, segiz Vengrııa jáne eki Germanııa azamaty bolǵan, dep habarlaıdy Egemen.kz Euronews-ke silteme jasap.
Áýe kemesi áıgili Masaı-Mara ulttyq qoryǵyna baǵyt alǵan. Bılik ókilderiniń habarlaýynsha, ushaq Dıanı qalasynyń ushý-qoný jolaǵynan shamamen 40 shaqyrym jerde, ormandy jáne tóbeli aımaqta qulaǵan.
Aldyn ala málimetter boıynsha, apat kezinde aýa raıy qolaısyz bolǵan, nóserli jańbyr jaýyp turǵan. Kýágerlerdiń aıtýynsha, ushaq qulaǵan sátte qatty jarylys daýysy estilgen.
Qazirgi tańda quqyq qorǵaý organdary apattyń naqty sebebin anyqtap jatyr. Mombasa Air Safari áýe kompanııasy qaza tapqandardyń otbasylaryna kóńil aıtyp, tergeý barysyna tolyqtaı qoldaý kórsetip otyrǵanyn málimdedi.