2025 jyldyń basynan beri 11 012 etnıkalyq qazaq tarıhı otanymen tabysyp, qandas mártebesin aldy. Jalpy 1991 jyldan beri respýblıkaǵa 1 mıllıon 159,1 myń etnıkalyq qazaq oralǵan, dep habarlaıdy Egemen.kz.
Eńbek jáne halyqty áleýmettik qorǵaý mınıstrliginiń málimetinshe, bıyl elge qonys aýdarǵandardyń 45,7 paıyzy – О́zbekstannan, 42,1 paıyzy – Qytaıdan, 4,5 paıyzy – Túrikmenstannan, 2,6 paıyzy – Reseıden, 2,6 paıyzy – Mońǵolııadan, al qalǵan 2,5 paıyzy basqa elderden kelgen.
«Osy jylǵy 1 qazandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 58,4%-dy, eńbekke qabiletti jastan kishi 32,8%-dy jáne zeınetkerler 8,8%-dy quraıdy.Eńbekke qabiletti jastaǵy qandastardyń ishinen bilim deńgeıi boıynsha 15,3%-y joǵary bilimdi, 28,4%-y orta kásibı bilimdi, 50,6%-y jalpy orta bilimdi, jáne 5,7% bilim joq», delingen habarlamada.
Qandastar eldiń barlyq óńirlerine qonystanǵanymen, eńbek kúshi tapshy aımaqtarǵa erekshe nazar aýdarylǵan. Bul qatarda Aqmola, Abaı, Qostanaı, Pavlodar, Atyraý, Batys, Shyǵys jáne Soltústik Qazaqstan oblystary bar.
2025 jylǵa arnalǵan kvota boıynsha osy óńirlerge 2 309 qandasty qabyldaý josparlanǵan, al qazan aıynyń basyna deıin 1 725 adam soltústik jáne shyǵys oblystarǵa qonys aýdarǵan.
Aıta keteıik, memleket tarapynan qandastarǵa birqatar áleýmettik qoldaý sharalary usynylady. Otaǵasyna jáne otbasy músheleriniń árqaısysyna bir rettik 70 AEK (shamamen 275 myń teńge) kóshý járdemaqysy beriledi. Sondaı-aq turǵyn úı jaldaý men kommýnaldyq tólemderdi óteý úshin bir jyl ishinde 15-ten 30 AEK-ke deıin (59 myńnan 118 myń teńgege deıin) beriledi.
Jyl basynan beri 916 qandasqa túrli qoldaý kórsetilip, onyń ishinde 277 adam turaqty jumysqa ornalasqan.
Budan bólek, erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4,56 mln teńgege deıin mólsherinde birjolǵy óteýsiz jáne qaıtarymsyz negizde engizildi.