Almatydaǵy «Ortalyqtandyrylǵan kitaphana júıesine» qarasty №31 kitaphananyń uıytqy bolýymen «Egemendikpen – erteńimizge» dep atalǵan rýhanı-tanymdyq kesh ótti. Mazmundy basqosý qazaq jýrnalıstıkasynyń kórnekti ókili Marat Toqashbaıdyń shyǵarmashylyǵyna arnalyp, qalamgerdiń bestomdyq shyǵarmalar jınaǵy tanystyryldy.
«Ýaqyt jebesi» atty bestomdyq el ómiriniń keıingi otyz jyldaǵy mańyzdy tustaryn qamtıdy. Onyń alǵashqy tomy memlekettegi qoǵamdyq-saıası ózgeristerdi eksheýge, saıası baǵa berýge baǵyttalsa, «Tuǵyry bıik tulǵalar» dep atalǵan ekinshi tomdyqqa avtordyń baspasóz betterinde ult tarıhynan oıyp oryn alatyn tarıhı tulǵalarmen órbigen suhbattary men maqalalary engen. «Alapat soǵys aqıqaty» dep atalǵan úshinshi kitap surapyl soǵys kezeńiniń qazaq oqyrmanyna buryn beımálim, qupııa tustaryn ashyp, qaısar jaýyngerlerdiń erligi men ómir órneginen syr shertedi. Al «Dıalogter dúbiri», «Otbasylyq órnek» dep atalǵan kelesi kitaptardyń da oqyrmanǵa bereri mol.
Jyly júzdesýde kesh qonaǵy kórermender suraǵyna jaýap berip, táýelsizdiktiń qadir-qasıeti, Egemendik deklarasııasy qabyldanǵan tustaǵy tarıhı oqıǵalar týraly baıandap, ult muraty, urpaq tárbıesine qatysty oılaryn ortaǵa saldy.
Búginde keń qoldanysqa engen «Doǵarys» (otstavka), «Pikirterim» (opros), «Oqtumsyq» (boegolovka), «Tosynsyı» (sıýrprız), «Nópir shaq» (chas pık), «Aılabuıym» (prısposoblenıe), «Zańastar qujattar» (podzakonnye akty) t.b. ondaǵan sózder men tirkesterdiń avtory Marat Baıdildáuly ulttyq baspasóz ben televızııada jetekshi qyzmetter atqaryp, ult rýhanııaty men mádenıetimizdiń damýyna súbeli úles qosyp keledi.
Áserli keshte Qurmanǵazy atyndaǵy Qazaq ulttyq konservatorııasy vokaldyq óner kafedrasynyń pro-fessory Sáýle Nurǵalıeva, «Kemel» shaǵyn aýdanyndaǵy «Belsendi ómir súrý» ortalyǵynyń múshelerinen quralǵan «Beý, aıdaı» ájeler ansambli óner kórsetti. Jınalǵandar Marat Baıdildáulynyń shyǵarmashylyǵy men ómir jolynan syr shertetin fotosýretter kórmesin tamashalady.
ALMATY