Topqaıyńǵa aýyzsý berildi

Qabyrǵaly qalamger Qalıhan Ysqaqtyń aýylyndaǵy aýyz­sý máselesi búginge deıin bir emes, birneshe márte kóterildi. Aýyldyń ortasyndaǵy jalǵyz qudyq pen ózennen sý tasyp iship otyrǵan el aryz-armanyn aıtyp, joǵaryǵa neshe márte shaǵymdanǵan. Bıyl saǵyzsha sozylǵan jobaǵa bel sheshe kirisken merdiger anyqtalǵan soń oblys basshysy Nurymbet Saqtaǵanov Topqaıyńǵa arnaıy barǵan, jaýapty organdarǵa qadap turyp tapsyrma bergen. 1 qarashaǵa deıin aýylǵa aýyzsý berilmegen jaǵdaıda jaýapkershiliktiń baryn eskertken. Nátıjesinde, Respýblıka kúni aýyzsý berilip, ýáde oryndaldy.

Eske salsaq, tórt jyl buryn bastalǵan bul jobaǵa jaýapty merdiger «QazConstructions» JShS mindetine salǵyrt qara­ǵandyqtan, jumys ýaq­tyly aıaq­talmaı, halyqtyń narazy­ly­ǵyn týdyrǵan. Jobanyń jalpy quny áýelde 602,865 mln teńgeni qurasa, keıin memleketten 77 mln teńge qarastyrylǵan.

– Osy ýaqytqa deıin aýyl­­dyń tómengi jaǵy qu­dyqtan sý ishse, joǵarǵy jaǵy ózennen tasyp iship otyrdy. Aýyzsý tartylady degeli tórt jyl boldy. Áýelde qýanyp edik, keıin jumys júrmeı qaldy. Áıteýir oblys basshysynyń qadaǵalaýymen, tapsyrmasymen jumys aıaq­taldy. Qýanyp jatyrmyz, – deıdi Topqaıyń aýylynyń aqsaqaly Naımanǵazy Ibraev.

Aıta keteıik, Memleket basshysy Qasym-Jomart Toqaev 2025 jyly óńirlerdi 100 pa­ıyz taza aýyzsýmen qamtýdy tap­syr­ǵan. Ol qanshalyqty oryndalady, jyl sońyna qaraı belgili bolar.

Mereke qar­sa­ńynda Katon­qaraǵaı aýy­­lyn­da deneshy­nyq­tyrý-sa­ýyq­tyrý ortalyǵy ashyldy. Munda jas­óspirimder men balalar kúres­pen, bokspen aınalysa alady. Voleıbol men fýtbolǵa da zal bar. Odan bólek jattyǵý zaly, bas­seın qarastyrylǵan. Keshen bas­shylyǵynyń aıtýynsha, dene­shynyqtyrýmen aınalysamyz degen aýdan turǵyndaryna da esik ashyq. Kestege sáıkes, júıeli túrde sportpen aınalysýǵa mol múmkindik.

Keıingi jyldary aýyl-aýyl­da áleýmettik nysandardyń ­ashy­lyp, turǵyndardyń turaq­ta­ýyna aıtýly jaǵdaı jasalyp jatyr.

Shyǵys Qazaqstan oblysy,

Katonqaraǵaı aýdany