PETROPAVL. 20 aqpan. Soltústik Qazaqstan oblysynyń tártip saqshylary Jambyl jáne Tımırıazev aýdandarynda sibir elikterin atyp alyp, ońaı oljaǵa kenelmek bolǵan kúdiktilerdiń jolyn kesti. Bul týraly ishki ister departamentiniń baspasóz qyzmeti habarlady.
Tabıǵat qorǵaý polısııasynyń qyzmetkeri Eslámbek Mákenovtyń aıtýynsha, kezekti reıd kezinde Kazanka aýylynyń 67 jastaǵy turǵyny ustalǵan. Ol túlki men elikti shatastyryp alǵanyn aıtyp qansha jaltarsa da, qylmystyq jaýapkershilikten qutyla almaıtyn boldy.
Dokýchaev eldi mekeniniń bes turǵyny elik atýǵa ábden saılanyp shyqqanǵa uqsaıdy. Toyota avtokóligin tintý barysynda eki eliktiń eti, túliktiń terisi, IJ-43 12 kalıbrli qos myltyq jáne sómke toly oq alyndy.
Zańsyz ań aýlaýshylardyń ústinen Qylmystyq Kodekstiń 337-shi baby boıynsha qylmystyq iz qozǵaldy. Qylmystary dáleldengen jaǵdaıda 2000 aılyq eseptik kórsetkish mólsherinde aıyppul tóleýi, túzeý jumystaryna jiberilýi bolmasa 2 jylǵa deıin bas bostandyqtarynan aırylýy múmkin. Budan tysqary 100 aılyq eseptik kórsetkish kóleminde aıyppul tóleýlerine týra keledi.
Oblystyń polısııa qyzmetkerleri jyl basynan beri zańsyz ań jáne balyq aýlaýdyń 73 oqıǵasyn ashty. 2 maral, 7 elik jáne 1 túlki atyp alý oqıǵalaryna baılanysty 5 qylmystyq is júrgizilýde.
О́mir Esqalı.
Derek: Soltústik Qazaqstan oblystyq ishki ister departamentiniń baspasóz qyzmeti.
Sýret: today.kz.