Premer-mınıstr Oljas Bektenovtiń tóraǵalyǵymen ótken keńeste Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýynda berilgen ınvestısııa tartý jónindegi mindetterdi oryndaý barysy qaraldy, dep habarlaıdy Egemen.kz.
Keńeske Premer-mınıstrdiń orynbasary – ulttyq ekonomıka mınıstri Serik Jumanǵarın, syrtqy ister mınıstriniń orynbasary Álibek Qýantyrov, oblys ákimderi jáne QR Bas prokýrorynyń birinshi orynbasary Jandos О́mirálıev qatysty.
Oljas Bektenov Prezıdenttiń 2029 jylǵa deıin Qazaqstan ekonomıkasyna 150 mıllıard dollar sheteldik ınvestısııa tartý jónindegi strategııalyq mindetine nazar aýdardy.
Ulttyq ekonomıka mınıstrliginiń málimetinshe, bıylǵy 9 aıda negizgi kapıtalǵa salynǵan ınvestısııa kólemi 13,8 trln teńgeni qurady. Bul ótken jyldyń sáıkes kezeńimen salystyrǵanda 13,5%-ǵa artyq. Eń joǵary ósim energetıka, óńdeý ónerkásibi, aýyl sharýashylyǵy jáne kólik salalarynda baıqalǵan.
Investısııalardyń basym bóligi jyljymaıtyn múlik, kólik jáne taý-ken ónerkásibine baǵyttalǵan. О́ńirler arasynda Astana qalasy men Túrkistan oblysy jospardy oryndaýda kósh bastap keledi. Al Qaraǵandy, Atyraý, Ulytaý jáne Abaı oblystary belgilengen mejeden artta qalyp otyr.
Biryńǵaı ulttyq pýl sheńberinde bıyl 185 ınvestısııalyq joba júzege asyryldy. Jyl sońyna deıin taǵy 268 jobany iske qosý josparlanǵan.
«Jalpy tikeleı sheteldik ınvestısııalar (TShI) kólemi $10,1 mlrd-ty qurady. О́ńdeý ónerkásibi, qarjy sektory, kólik, baılanys jáne energetıka salalaryna qarajat belsendi tartylýda. Soltústik Qazaqstan, Aqmola jáne Túrkistan oblystary, sondaı-aq Astana qalasy TShI boıynsha maqsatty kórsetkishke qol jetkizýde kósh bastasa, onyń qatarynda Pavlodar, Qaraǵandy, Atyraý, Aqtóbe, Almaty, Shyǵys Qazaqstan jáne Abaı oblystary bar», delingen habarlamada.
Premer-mınıstrdiń aıtýynsha, negizgi kapıtalǵa ınvestısııa tartý jospary 52,7%-ǵa, al tikeleı sheteldik ınvestısııalar jospary jartysynan az deńgeıde oryndalǵan. Ol jobalardy júzege asyrýdyń baıaý júrýin memlekettik organdardaǵy artyq bıýrokratııalyq rásimder men merzimderdiń keshiktirilýimen baılanystyrdy.
Atyraý oblysynda negizgi kapıtalǵa ınvestısııa tartý josparynyń oryndalýy 42,8%, Ulytaý oblysynda 61,5%, Abaı oblysynda NKI boıynsha 70,4%, al TShI boıynsha 26,2% bolǵan. Munda mys balqytý zaýyty men kúnbaǵys maıyn óńdeý sehy sııaqty birqatar jobalar jabdyqtardyń keshigip jetkizilýine baılanysty túıtkildi máseleler týyndap otyr.
«Ákimder men mınıstrler ınvestısııa tartý máselelerimen kún saıyn tikeleı aınalysýy tıis. Bul eń mańyzdy másele. Investısııa bolmasa, ekonomıkada eshqandaı damý bolmaıdy. Artta qalǵan óńirlerdiń ákimderine ınvestısııalar boıynsha nysanaly kórsetkishterge qol jetkizbegeni úshin óz orynbasarlaryn tártiptik jaýapkershilikke tartýdy tapsyramyn», dedi Oljas Bektenov.
Sonymen qatar jıynda ınvestorlardy súıemeldeý júıesiniń tıimdiligin arttyrý sharalary da qaraldy. Iri ınvestısııalyq jobalardy ýaqtyly iske qosý úshin ınfraqurylym salý máselelerine kóńil bólindi. Sondaı-aq ınvestorlar quqyqtaryn qorǵaý máseleleri talqylandy.
Tizilimge engizilgen ınvestorlarǵa qatysty «prokýrorlyq súzgini» engizý 380 zańsyz tekserý men 450 ákimshilik óndiristiń jáne eki 200-ge jýyq shekteý sharasynyń jolyn kesýge múmkindik berdi. El ekonomıkasyna qosqan úlesi shamamen 19 trln teńgeni quraıtyn 1800 ınvestorǵa kómek kórsetildi.
Keńes qorytyndysynda Premer-mınıstr ınvestısııalyq jobalardy ýaqtyly iske asyrýdy, óńirlerdiń belsendiligin arttyrýdy jáne bıýrokratııalyq kedergilerdi joıýdy tapsyrdy.