Túrkistan oblysynda kezekti ınvestısııalyq joba júzege asyrylyp, 100 jergilikti turǵyn turaqty jumyspen qamtyldy. Túlkibas aýdany Kúmisbastaý aýylynda áıgili «RC Cola» brendimen jumys isteıtin «Beibars Bottlers» kompanııasynyń zamanaýı sýsyn óndirý zaýyty ashyldy.
Aýyzsý men alkogolsiz sýsyndar óndirýge mamandanǵan kásiporynǵa shamamen 9 mlrd teńge kóleminde ınvestısııa tartylǵan. Zaýyt jylyna 120 myń tonnaǵa deıin sýsyn óndiredi. О́nimder metall jáne plastık qutylarda shyǵarylyp, ishki naryqtan bólek, kórshi elderge de eksporttalmaq. Jańa zaýyttyń ereksheligi – nemis jáne ıtalııalyq zamanaýı tehnologııalarǵa negizdelgen óndiris jelileri men ekologııalyq taza, kópsatyly sý tazartý júıesi. О́ndiriste paıdalanylatyn sý kásiporyn mańyndaǵy 170 metr tereńdiktegi uńǵymalardan alynyp, joǵary halyqaralyq standarttarǵa saı tazartylady. Sýdyń sapasy AQSh pen Italııanyń jetekshi zerthanalarynda arnaıy tekseristen ótken.
Jańa zaýyttyń ashylý saltanatynda oblys ákimi Nuralhan Kósherov kásiporyn ujymyna sáttilik tilep, memleket tarapynan kórsetilgen qoldaýlarǵa toqtaldy.
«Prezıdent Qasym-Jomart Toqaev elimizde kásipkerlikke qoldaý kórsetýdi, sheteldik jáne otandyq ınvestorlar úshin qolaıly orta qalyptastyrýdy basty basymdyqtardyń biri retinde atap ótti. Bul joba – sol tapsyrmalardyń naqty oryndalýynyń aıǵaǵy. Jergilikti ákimdik ınfraqurylymdy jetkizip, barlyq qajetti qoldaýdy kórsetti. Endigi mindet – sapaly ónim shyǵaryp, ony tek ishki emes, syrtqy naryqqa da usyný», dedi oblys ákimi.
Ashylý rásimine qatysqan «RC Cola International» kompanııasynyń bas menedjeri Frensıs Lampera, «Freedom Bank» basqarma tóraǵasy Gúlfaırýz Ahmetova, sondaı-aq jobanyń ıdeıa avtory ári ınvestory – «Beibars Bottlers» JShS quryltaıshysy Amangeldi Nurov kásiporynnan básekege qabiletti ónim shyǵatynyna senim bildirip, izgi tilekterin jetkizdi. Jobany iske asyrý aıasynda zaýyttyń ınfraqurylymyn jetkizý úshin 705 mln teńgege 6 140 metrlik 35 kV elektr jelisi men qosalqy stansa salyndy. Jalpy aýmaǵy – 5 565 sharshy metr bolatyn zaýytqa 25 mln teńgege tabıǵı gaz qubyry tartylyp, 240 mln teńgege káriz júıesi men tazartý qondyrǵylary ornatylǵan.
Aıta ketelik, Túlkibas aýdanynda qýattylyǵy jylyna 48 myń tonna qus etin óndiretin fabrıkanyń qurylysy júrgizilmek. Jobaǵa jalpy 53,7 mlrd teńge ınvestısııa tartylady. Qoldaý kórsetý maqsatynda «Túrkistan» áleýmettik-kásipkerlik korporasııasy tarapynan 5 mlrd teńge nesıe berilmek. Sonymen qatar memleket tarapynan qajetti ınfraqurylymmen qamtamasyz etý jumystary júrgiziledi. Joba iske qosylǵanda 1 200-den asa jańa jumys orny ashylady. Aýmaǵy 517,7 gektar jer bolatyn joba aıasynda 96 qus fermasyn, ınkýbator, qurama jem zaýyty, gaz-elektr stansasy, qus soıý jáne qaldyq óńdeý sehy jáne tońazytqysh qoımalar salý kózdelgen. Joba úsh kezeńnen turady. Birinshi kezeńi 2026–2027 jyldary júzege asyrylyp, 21,9 mlrd teńge ınvestısııa salynady, 550 jumys orny qurylyp, 15 myń tonna ónim óndirý josparlanyp otyr. Ekinshi kezeńde 15,8 mlrd teńge ınvestısııa tartylyp, 325 jumys orny ashylmaq. О́ndiriletin ónim kólemi – 24 myń tonna. Úshinshi kezeń 2029–2030 jyldary júzege asyrylyp, 16 mlrd teńge ınvestısııa salynady, 48 myń tonna ónim óndirilip, 325 jumys orny qurylady.
Túrkistan oblysy