Bul týraly Qasym-Jomart Toqaev «Qazaqstan – akademııalyq bilim aımaǵy» strategııalyq seriktester forýmyndaǵy sóılegen sózinde aıtty, dep habarlaıdy Egemen.kz Aqordanyń baspasóz qyzmetine silteme jasap.
Prezıdent Ortalyq Azııa elderindegi jáne bizdiń aımaqpen kórshiles birqatar memlekettegi demografııalyq kórsetkishtiń artýy joǵary bilimdi eksporttaýǵa jáne shetel stýdentterin elimizge tartýǵa eleýli múmkindik beredi dep sanaıdy.
«Qazaqstan jahandyq bilim naryǵynyń bir bóligine aınalýdy kózdep otyr. Sondyqtan aldymyzǵa kúrdeli, alaıda asa mańyzdy maqsat qoıdyq. Oǵan jetý úshin álemniń 40 jetekshi ýnıversıtetimen seriktestik ornatylyp, elimizde sheteldik joǵary oqý oryndarynyń 33 fılıaly ashyldy. Kóptegen fılıalda oqý aǵylshyn, orys, qytaı tilderinde júrgiziledi. Bul – asa mańyzdy. О́ıtkeni bilim berý salasyndaǵy kóptildilik adamdardyń nemese ýnıversıtetterdiń, tipti, tutas memleketterdiń ashyqtyǵy men báseke qabilettiliginiń negizin qalaıdy. Keleshekte de solaı bolmaq. Oǵan esh kúmán joq. Sondyqtan álemdik akademııalyq keńistikke shyǵýǵa sanaly túrde mańyzdy qadam jasadyq. Buǵan qosa barlyq fılıalda qazaq tili men Qazaqstan tarıhy mindetti pán retinde oqytylady. Bul sheteldik stýdentterdiń mádenıetimiz ben mentalıtetimizdi tereń túsinýine kómektesedi», dedi Qasym-Jomart Toqaev.
Memleket basshysy: «2029 jylǵa qaraı elimizde bilim alatyn sheteldik stýdentter sanyn 100 myńǵa deıin jetkizý kózdelip otyr»
Prezıdenttiń aıtýynsha, qazirgi kezde elimizdiń joǵary oqý oryndarynda 31 myńnan astam shetel stýdenti bilim alady. Bul – qazirgi sátte Qazaqstan úshin rekordtyq kórsetkish.
2029 jylǵa qaraı atalǵan mejeni 100 myńǵa deıin jetkizý kózdelip otyr. Ol úshin vıza rejımi ońtaılandyrylyp, sheteldikterdiń alańsyz bilim alýyna barynsha qolaıly jaǵdaı jasalady.
Úzdik túlekterdiń Qazaqstanda turaqtap qalýyna múmkindik beretin jumyspen qamtý baǵdarlamasy iske qosylady.
«Shetel ýnıversıtetteriniń fılıalyn ashý ınjenerlik jáne IT bilimdi damytý maqsatymyzǵa tolyq saı keledi. Qazaqstanda qoldanbaly ınjenerııanyń biregeı ınstıtýty sanalatyn úsh Lý Ban sheberhanasy ashyldy. Bul Qytaı úkimetiniń bastamasy ekeni barshańyzǵa málim. Pen Dýan myrza baıandamasynda qytaı mamandarynyń elimizge erekshe nazar aýdaryp otyrǵanyn ári Qazaqstandaǵy adam áleýetiniń joǵary ekenin atap ótti. Biz úshin ıadrolyq energetıka salasyna maman daıarlaý da erekshe mánge ıe. MIFI rektory Vladımır Igorevıch Shevchenko osy mańyzdy iske belsendi atsalysýǵa nıet bildirdi. Sizben birge jumys isteımiz. Mindetimiz – bilim men ǵylymdy ekonomıkanyń naqty sektorymen tikeleı baılanystyrý. Bul baǵytta sátti mysaldar bar. Erbol Maratuly Isaqaev baıandaǵandaı, Qozybaev ýnıversıteti men Arızona ýnıversıtetiniń seriktestigi nátıjesinde kúkirtti ınnovasııalyq polımerge aınaldyratyn ozyq tehnologııa ázirlendi. Bul – óte qajet joba. Sebebi elimizde kúkirttiń qory mol. Atalǵan joba hımııa ónerkásibiniń damýyna tyń serpin beredi, eń bastysy, ekologııalyq túıtkilderdiń sheshilýine túrtki bolady», dedi Memleket basshysy.