Qazaqstan Respýblıkasynyń Memlekettik keńesshisi – Qazaqstannyń IýNESKO jáne ISESKO isteri jónindegi ulttyq komıssııasynyń tóraǵasy Erlan Qarın О́zbekstan Respýblıkasynyń Samarqand qalasynda ótip jatqan IýNESKO Bas konferensııasynyń 43-shi sessııasy aıasynda birqatar ekijaqty kezdesý ótkizdi, dep habarlaıdy Egemen.kz.
О́zbekstan Respýblıkasy Prezıdenti Ákimshiliginiń basshysy Saıda Mırzııoevamen bolǵan kezdesýde eki el arasyndaǵy, sonyń ishinde IýNESKO aıasyndaǵy mádenı-gýmanıtarlyq yntymaqtastyq pen ózara is-qımyl áleýeti talqylandy.
Erlan Qarın Memleket basshysynyń Qazaqstandy odan ári jańǵyrtýǵa baǵyttalǵan jańa bastamalary týraly aıtty.
Taraptar óńirlik bastamalardy ilgeriletý, onyń ishinde IýNESKO-nyń Materıaldyq emes mádenı mura jáne Búkilálemdik muralar tizimi aıasyndaǵy transulttyq nomınasııalardy utymdy úılestirý jumystaryn jalǵastyrý týraly kelisimge keldi.
Erlan Qarın IýNESKO-nyń jýyrda ókilettigi aıaqtalatyn Bas dırektory Odre Azýlemen bolǵan kezdesýde keıingi jyldary Qazaqstannyń birqatar usynysy (Turan shólderi, Betashar, Handar shejiresi jáne t.b.) IýNESKO-nyń bedeldi tizimderine, sondaı-aq 2024-2025 jyldary B.Soqpaqbaev pen N.Tilendıevtiń 100 jyldyq mereıtoılary IýNESKO-nyń ataýly kúnder kúntizbesine engizilgenin atap ótti. IýNESKO-nyń qoldaýymen Almaty qalasyndaǵy Ortalyq Azııa óńirlik glıasıologııalyq ortalyǵy aldaǵy segiz jyldyq kezeńde óz jumysyn jalǵastyrýǵa múmkindik aldy.
Odre Azýle Prezıdent Qasym-Jomart Toqaevtyń halyqaralyq bastamalary men Qazaqstanda iske asyryp jatqan reformalary mańyzdy ekenine nazar aýdardy.
Kezdesý barysynda Memlekettik keńesshi Qazaqstan Respýblıkasynyń Prezıdenti Qasym-Jomart Toqaevtyń atynan halyqaralyq yntymaqtastyqty nyǵaıtýǵa ári bilim, ǵylym jáne mádenıet salalarynda Qazaqstanmen áriptestikti damytýǵa qosqan eleýli úlesi úshin Odre Azýlege II dárejeli «Dostyq» ordenin tapsyrdy.