Respýblıka kúni merekesinde «Astana Opera» teatrynyń K.Baıseıitova atyndaǵy Kameralyq zaly sahnasynda «Qazaq kınosynyń mýzykasy» atty tamasha konsert ótti. Oǵan óner ordasynyń Kameralyq orkestri men opera trýppasynyń solısteri qatysty.
Bul jobanyń avtory – tanymal mýzykant, dırıjer Álıhan Ydyrysov. Oǵan bul ıdeıa Qurmanǵazy atyndaǵy Qazaq ulttyq konservatorııasynda oqyp júrgende kelipti. О́nerpazdyń alǵashqy jobasy 2014 jyly «Astana Opera» teatrynda jol tartty. Sodan beri daryndy mýzykanttyń ár konserti jurtshylyqtyń úlken qoldaýyna ıe bolyp keledi.
Al óner keshinde qazaq kınosynyń altyn qoryna kirgen «Gaýhartas», «Taqııaly perishte» sekildi kórkem fılmderdegi áýender oınaldy. Bul týyndylar tyńdarmen júreginen jol tapqaly qashan! Sonda da ony ár tyńdaǵan saıyn keremet áser alasyń. Kınodaǵy keıipkerler kóz aldyńyzǵa keledi. Olardyń ár obrazy kóńilge sondaı ystyq. Sonymen qatar «Aǵam nemese neke», «Toqta, tún», «Reketır», t.b. zamanaýı fılmderdiń mýzykalary da kesh kórigin qyzdyrdy. Barlyq ásem áýendi kameralyq orkestrdiń súıemeldeýimen opera trýppasynyń solısteri naqyshyna keltire shyrqady. Orkestrge Qazaqstannyń eńbek sińirgen qaıratkeri Aıdar Ábjahanov jetekshilik etti.
Osy fılmder mýzykasyn orkestrge Álıhannyń ózi óńdegen. Bul shyǵarmalar kaver nusqada oryndaldy. Sondyqtan jurtshylyq ony jańa qyrynan tyńdady.
«Ideıa adamǵa árqalaı keledi. Keıde kıno kórip otyrǵanda «osy mýzykany sahnaǵa shyǵarsam qalaı bolady?» nemese «Myna ándi orkestrlik óńdeýde jańasha estýge bolatyn edi» degen oılar týady. Bastysy, tyńdarmandar rıza bolsa deımin. Konsert baǵdarlamasyna A.Zasepın sekildi aıtýly kompozıtor- lardan bastap, zamanaýı avtorlardyń da týyndylaryn qostym. Mundaǵy maqsat – jastardyń suranysyna jaýap berip, olardy teatrǵa kóbirek tartý», dedi Á. Ydyrysov.
Azamat QUSAIYN