Reseıdiń «MIFI» Ulttyq ıadrolyq zertteý ýnıversıteti rektory Vladımır Shevchenkonyń aıtýynsha, Qazaqstan ıadrolyq energetıka jáne joǵary bilikti mamandar daıarlaý salasynda óz ustanymyn birizdi túrde nyǵaıtyp keledi, dep habarlaıdy Egemen.kz.
Onyń sózinshe, Qazaqstan búginde jahandyq atom naryǵynyń mańyzdy qatysýshysy sanalady, ýran óndirý kólemi boıynsha álemde birinshi, al qory jóninen ekinshi orynda tur. Bul kórsetkishter atom salasynda ulttyq ǵylymı-tehnologııalyq áleýetti qalyptastyrýǵa strategııalyq alǵysharttar jasaıdy.
MIFI fılıaly 2022 jyldan beri Ál-Farabı atyndaǵy Qazaq ulttyq ýnıversıteti bazasynda jumys isteıdi. Ol Qazaqstan Respýblıkasynyń Prezıdenti tapsyrmasymen ashylǵan. Munda mamandar myna baǵyttar boıynsha daıyndalady: ıadrolyq energetıka, radıasııalyq qaýipsizdik jáne qoldanbaly fızıka.
Oqytý úderisine MIFI-diń 23 oqytýshysy tartylǵan. Stýdentter atom ónerkásibi kásiporyndarynda tájirıbeden ótip, Máskeýde taǵylymdamadan ótedi.
«Qazaqstan ıadrolyq quzyretterdi damytýda júıeli tásildi ustanyp otyr. Elde bilim berý, ǵylym jáne óndiris ózara baılanysta damyp keledi», – dedi Vladımır Shevchenko.
Qazirgi ýaqytta fılıalda 125 stýdent pen 39 magıstrant bilim alýda. Joǵary ónimdi esepteý júıeleri salasy boıynsha alǵashqy túlekter oqýyn aıaqtap, olardyń basym bóligi Qazaqstanda jumysqa ornalasqan.
MIFI rektorynyń aıtýynsha, bul kórsetkishter ıadrolyq sala mamandaryna degen joǵary suranys pen iske asyrylyp jatqan bilim berý baǵdarlamalarynyń tıimdiligin dáleldeıdi.
Almatydaǵy MIFI fılıalynyń damýy jańa ıadrolyq energetıka úshin kadrlyq áleýet qalyptastyrý jáne eldiń tehnologııalyq qaýipsizdigin nyǵaıtý isinde Qazaqstan strategııasynyń mańyzdy bóligi bolyp otyr.