Keshe Almatyda úsh kúnge sozylǵan VII Halyqaralyq shashyrańqy skleroz jónindegi túrki kongresi aıaqtaldy, dep jazady Egemen.kz.
Oqyrmanǵa túsinikti bolýy aldymen shashyrańqy sklerozdyń kádimgi umytshaqtyqqa qatysy joq, ımmýndyq júıe mı men julyn tinderine shabýyldaıtyn qaýipti aýtoımmýndy dert ekendigin aıta ketý kerek. Bul aýrý adamnyń óz betinshe júrip-turýy, aqyl-esi, zerdesi, emosııalyq kúıi men kórý qyzmetterin qurtady. Eger ony emdeýdi erte bastamasa, ol jyldam asqynyp, múgedektikke dýshar etýi ábden múmkin.
Dúnıejúzilik densaýlyq saqtaý uıymynyń málimeti álemde shamamen 1,8 mıllıon adam shashyrańqy sklerozǵa shaldyqqanyn alǵa tartady. Basqa derekkózderine sáıkes, bul dıagnoz ár 5 mınýt saıyn bir adamnan anyqtalatyndyqtan, ýaqyt óte kele oǵan shaldyqqandardyń jalpy sany 3,5 mıllıonǵa deıin jetip jyǵylýy múmkin. Aýrý 20-40 jas aralyǵyndaǵy adamdarda jıi kezdesse, olardyń 70%-y – áıelder.
Túrkitildes elderdiń shashyrańqy skleroz jónindegi kongresi óte kúrdeli de qıyn sımptomatıkalyq jaǵdaılardy emdeýge erekshe nazar aýdardy.Nevrologııanyń bir birimen baılanysty salalaryndaǵy jetekshi mamandar shashyrańqy sklerozdy dıagnostıkalaý men emdeýdiń sońǵy ádisteri, sımptomatıkalyq terapııanyń erekshelikteri jóninde pikir almasty.
Kongreste júıke júıesiniń demıelınızasııalyq aýrýlaryn dıagnostıkalaýdaǵy ınnovasııalar, sımptomatıkalyq terapııanyń zamanaýı tásilderi, ońaltý men pasıentterdi kútýdegi pánaralyq sheshimder basty taqyrypqa aınaldy.
Mysaly, elimizde qazirgi tańda 3885 naýqas resmı tirkelgen desek, onyń 2527-si – áıelder. Jańadan anyqtalǵan 644 jaǵdaıda, onyń da basym bóligi, ıaǵnı 463-i – qyz-kelinshekter. Al dıspanserlik baqylaýda 18 jastan asqan 2894 eresek pasıent tur.
«Úsh jyl buryn Qazaqstanda bul aýrýdyń klınıkalyq hattamalary qabyldanǵan bolatyn. Eń bastysy, shashyrańqy sklerozdyń jaǵdaıyn ózgertetin jańa býyn preparattary paıda boldy. Olardyń keıbireýleri Tegin medısınalyq kómek jáne Mindetti medısınalyq saqtandyrý memlekettik qorynda bar, al eń qymbattary qaıyrymdylyq qorlary arqyly keledi.
Jáne bul aýrýdy emdeý barasynda úlken jetistikterge qol jetti. О́tken ǵasyrlarda sklerozdyń sońy sózsiz aýyr múgedektikke dýshar etse, búginde zamanaýı emdeý ádisteri men erte dıagnostıkanyń arqasynda ony baqylaýǵa bolady.
Em-dom júrgizýdegi negizgi maqsat – remıssııaǵa qol jetkizip, sony saqtaý. Zamanaýı medısına bul kezeńdi aıtarlyqtaı uzartyp, órshý jıiligin azaıtyp, sol arqyly múgedekter sanyn kemitýge múmkindik beredi», – deıdi QR Densaýlyq saqtaý mınıstrliginiń bas nevropatology, S.Asfendııarov atyndaǵy Qazaq ulttyq medısına ýnıversıtetiniń júıke aýrýlary kafedrasynyń meńgerýshisi Sáýle Turyspekova.
QR Nevropatologtar qaýymdastyǵy men S.Asfendııarov atyndaǵy Qazaq ulttyq medısına ýnıversıteti uıytqy bolǵan jıynǵa aınalamyzdaǵy túrkitildes elderdiń nevropatologtar qaýymdastyqtary da múddelestik tanytty.
Qazaqstan, Ázerbaıjan, Túrkııa, О́zbekstan, Qyrǵyzstan men basqa da túrkitildes elderdiń 300-deı jetekshi dárigerlerdiń basyn qosqan ǵylymı forýmǵa onlaın formatta bes myńǵa jýyq adam qatysty.
ALMATY