«Tengenomika» telegram-arnasynyń zertteýine súıensek, el ekonomıkasynda halyqtyń kúndelikti ómirine áser etetin naqty ózgerister baıqalǵan. Ishki jalpy ónim 7 aıda 6,3 paıyzǵa ósken. Biraq eń mańyzdysy san emes, ósimniń halyq turmysyna qalaı áser etkeninde bolyp otyr.
Keıingi jyldary el ishinde qozǵalys kúsheıdi. Adamdar jıi saparlaıdy. Kóbirek demalyp, qyzmet kórsetýge jıi júginedi. Buryn 6 mıllıon 600 myń adam saıahattasa, qazir 10 mıllıon 500 myń adam el ishinde demalǵan. Shetelge shyǵatyndar da úsh ese ósip, 1 mıllıon 190 myń adamǵa jetti. Áýe tasymaly da artty. Qazir jylyna 14 mıllıonnan astam adam ushaqpen júredi. Taksı qyzmetin qoldanatyndar sany da aıtarlyqtaı ósti. 2018 jyly 54 mıllıonnan astam adam taksı qoldansa, byltyr bul kórsetkish 73 mıllıon adam boldy.
«Ekonomıka san úshin emes, adam úshin jumys isteýi kerek. Eger halyq erkin júrse, demalsa, tabysyn erkin jumsasa, mine, osy naǵyz ósim. Keıingi jyldary otandastarymyz dál osyndaı múmkindikke ıe bola bastady. Bul eldiń damýy durys baǵytta ekenin kórsetedi. Ásirese adamdardyń demalysqa jıi shyǵyp, sapaly qyzmetterge júginýi senimniń artqanyn bildiredi», dep jazylǵan zertteýde.
Turǵyn úı alýshylar qatary da kóbeıgen. 2020 jyly 3 mıllıon 854 myń adamnyń jeke baspanasy bolsa, 2024 jyly bul kórsetkish 4 mıllıon 983 myń adamǵa jetti. Iаǵnı 5 jylda 1 mıllıonnan astam adam úı alǵan. Sonymen qatar elde tutyný mádenıeti de ózgerip jatyr. Adamdar sapaly taǵamǵa kóbirek kóńil bóledi. Et pen jemisti jıi tutynady. Áleýmettik toptarǵa arnalǵan azyq sebetine de 20 taýardyń ornyna 43 ataý engizildi.
Infografıkany jasaǵan – Záýresh Smaǵul, «EQ»
Qala men aýylda ınfraqurylym jańaryp keledi. Gaz tartý, jaryq ornatý, jol jóndeý, aýlalardy jaqsartý sııaqty jumystar júıeli júrip jatyr. Ásirese óńirlerdegi ózgeris aıqyn seziledi. Kóp jyl kútken áleýmettik jaqsartýlar iske asa bastady. Bul ómir sapasyna yqpal etip otyr. Ekonomıkanyń kólemi artqanymen, basty nazar endi onyń sapasyna aýyp keledi. Qazirgi mindet tek ósý emes, sol ósimniń ár adamǵa áserin kúsheıtý.
«Infraqurylym jaqsarsa, qoǵamdyq kóńil kúı de ózgeredi. Jaryǵy bar kóshe, taza aýla, tegis jol, jyly úı, mine, adamǵa eń keregi – osy. Ekonomıkalyq ósim degenimiz tek óndiris emes, eń aldymen turmys sapasynyń artýy. Qazir osyny kórip otyrmyz. Jurt erkin qozǵalady. Qyzmet qoljetimdi. Bolashaqta eń mańyzdysy ósimniń ózin emes, onyń qaıda jumsalǵanyn baqylaý bolady. El damýy jurttyń ómirinde kórinse, eńbektiń nátıjesi sonysymen baǵalanady. Biz búgin osy kezeńge ótip kelemiz. Qarapaıym adamnyń múmkindigi keńeıip, ómir sapasy artyp jatyr», dep túıindedi arna sarapshylary.