Memleket basshysy Qasym-Jomart Toqaev qyrkúıek aıynda AQSh-qa barǵan saparynda «OpenAI» kompanııasymen seriktestik ornatýǵa ýaǵdalasyp kelgen edi. Bul kelisim bilimge baǵyttalǵan. Jasandy ıntellekt salasyndaǵy alyp kompanııa tehnologııalaryn qanatqaqty joba retinde bastaýǵa qolaıly dep elimizge qyzyǵýshylyq tanytyp otyr.
Prezıdent «Qazaqstan – akademııalyq bilim aımaǵy» atty strategııalyq forýmda sóılegen sózinde jasandy ıntellektiniń elimiz úshin eń basty baǵyt ekenin taǵy da atap ótti.
– Qazaqstanda jasandy ıntellektini damytý jáne basqa salalarmen jan-jaqty ıntegrasııalaý eń joǵary strategııalyq basymdyq sanalady. JI sarapshylary men mamandaryn daıarlaý isine aıryqsha mán berip otyrmyz. Osy maqsatta jyl basynan beri «AI Sana» baǵdarlamasyn iske qostyq. 540 myńnan astam stýdent oqý kýrsynan ótti. Budan bólek, jasandy ıntellekt barlyq mektep pen ýnıversıtetke mindetti kýrs retinde engizildi. Elimizde Jasandy ıntellekt ýnıversıtetin ashý úshin daıyndyq jumystary júrgizilip jatyr, –dedi memleket basshysy.
Sondaı-aq «ChatGPT» negizinde bilim berý quraldaryn engizý jónindegi qanatqaqty jobany bilim salasyndaǵy sıfrlyq transformasııa retinde tanystyrdy.
– Nátıjesinde, Qazaqstan «ChatGPT» negizinde bilim berý quraldaryn engizý jónindegi qanatqaqty jobany júzege asyra bastady. Atalǵan bastamalar arqyly otandyq bilim salasynda jasandy ıntellekt áleýetine súıene otyryp, keshendi sıfrlyq transformasııa jasalyp jatyr, – dedi Qasym-Jomart Toqaev.
Qazaq–Amerıka ýnıversıtetiniń Prezıdenti Asylbek Isaqovtyń aıtýynsha, búginde elimiz «OpenAI» kompanııasymen yntymaqtastyq ornatý maqsatynda belsendi jumys júrgizip jatyr.
– «OpenAI» tarapynan elimizge úlken qyzyǵýshylyq bar. Kompanııa tehnologııalaryn bilim salasynda synaqtan ótkizýge daıyn jáne elimizdi qanatqaty alań retinde tańdaýǵa yqylas bildirip otyr. Biz mundaı jahandyq seriktespen birlesip jumys isteýge daıynbyz, – deıdi ol.
Qanatqaqty joba aıasynda «ChatGPT» bilim berý úderisine engizilip, stýdentterdiń oqý tıimdiligin arttyrý maqsat etip qoıyldy. Jobanyń tıimdiligi stýdentterdiń bilim sapasy arqyly baǵalanbaq.
– Árbir ýnıversıtet óz ereksheligine qaraı «ChatGPT» sııaqty quraldardy sabaq barysyna paıdalaný joldaryn qarastyryp jatyr. Bul stýdentter úshin oqý úderisin barynsha yńǵaıly ári nátıjeli etýge múmkindik beredi. «ChatGPT» qoldanylǵannan keıin stýdentterdiń bilim deńgeıi tereńdep, oılaý qabileti arta ma, joq pa baqylanatyn bolady. О́ıtkeni jasandy ıntellekt oqý materıalyn tıimdi meńgerýge, aqparatty jyldam óńdeýge, taldaý jasaýǵa múmkindik beredi, –deıdi A.Isaqov.
Osylaısha, elimizde «ChatGPT» negizindegi qanatqaqty joba bilim júıesiniń sıfrlyq transformasııasyndaǵy mańyzdy qadam bolmaq. Sarapshylardyń aıtýynsha, bul bastama eldiń bilim sapasyn jańa deńgeıge kóterip, stýdentterge zamanaýı tehnologııamen jumys isteý mádenıetin qalyptastyrýǵa jol ashady.