Aqtoǵaı topyraǵynda dúnıege kelgen dúldúlder men bulbuldardyń sanynda esep joq. Áset Naımanbaıulynan bastalǵan óner kerýeni Kúlásh Baıseıitova, Manarbek Erjanovtarmen jalǵasyp, «Toqyraýyn tolqyndaryna» ulasty. Shyǵarmashylyq ujymnyń sahnada júrgenine bıyl – elý jyl. Soǵan oraı halyqtyq án-bı ansambli Astana kórermenine esep berý konsertin berdi.
Aldymen ansambl ardagerleriniń qatysýymen dóńgelek ústel uıymdastyrylyp, ujymnyń tarıhy baıandaldy, estelikter aıtyldy. «Toqyraýyn tolqyndarynyń» mereıtoıyna arnalǵan kitap shyqqany habarlandy.
Ádetki ansamblder sekildi emes, «Toqyraýyn tolqyndary» – qazaq ónerine sony lep ákelgen shyǵarmashylyq ujym. Atap aıtsaq, HH ǵasyrǵa deıin qazaqta top bolyp án shyrqaý qalyptasa qoımaǵan. Shyrqaǵan kúnniń ózinde barlyǵy bir daýysta (ýnıson) aıtyp, ánniń boıaýynan góri dybystyq qýatyn arttyrýǵa kúsh jumsaǵan. Keıin mádenı yqpaldastyq nátıjesinde qazaq ánshileri eki daýysta án shyrqaýdy meńgerip aldy. Bul dombyradaǵy eki túrli tartylǵan ishektiń ózara úndese shyqqan dybysy sekildi. Mýzyka tilinde muny «polıfonııa» dep ataıdy.
Bul týraly ansambldiń hormeısteri, Qazaqstannyń eńbek sińirgen qaıratkeri Amantaı Jumashev aıtyp berdi. «Aqtoǵaılyq ustazym, «Toqyraýyn tolqyndarynyń» negizin qalaýshylardyń biri Dártaı Sádýaqasov ánge rejısserlik kózqaraspen qaraıtyn hormeıster edi. Qulaǵy ýnısonǵa úırengen halyqqa Dártaı aǵamnyń eki daýysty ansambli erekshe áser etti. Keıin mýzykalyq bilimimdi jetildirip kelgennen keıin «Toqyraýyn tolqyndaryn» eki daýysta ǵana emes, kóp daýysta shyrqaıtyn ansamblge aınaldyrdym», dedi Amantaı Jumashev. Rasynda, bas hormeısterdiń bul sózi «adam daýysynan asatyn aspap joq» deıtin Ál-Farabı pikirin qýattaı túskendeı.
Zamanynda belgili óner maıtalmandary halyqtyq ansambldiń ósip-órkendeýine zor úles qosty. Máselen, 1977 jyly «Gúlder» ansambliniń negizin qalaǵan estrada janrynyń tuńǵysh rejısseri Serik Eleýsizov pen baletmeıster, Qaz KSR eńbek sińirgen ártisi Záýirbek Raıbaev arnaıy shaqyrylyp, jańa baǵdarlama daıyndady. 1981 jyly belgili óner zertteýshisi Bolat Sarybaev ansambldiń negizgi quramynan folklorlyq aspaptar orkestrin quryp, baǵdarlamasyn júıelep berdi.
«Toqyraýyn tolqyndarynyń» ónerine halyqtyń sýsap qalǵany, tolassyz soǵylǵan shapalaqtan ańǵaryldy. Konsertte halyq jáne halyq kompozıtorlarynyń ánderi shyrqalyp, kúmbirlep kúı tógildi, ásem bı de boldy. Keshtiń jańalyǵy retinde Nurlan Kúlshikenovtiń óleńine jazylǵan Amantaı Jumashevtiń «Tolqı ber, Toqyraýyn» ániniń tusaýy kesildi.
Saltanatty is-sharada Áıelder isteri jáne otbasy-demografııa saıasaty jónindegi ulttyq komıssııa hatshysy Gaýhar Nurahmetova osy komıssııanyń tóraǵasy, Mádenıet jáne aqparat mınıstri Aıda Balaevanyń quttyqtaýyn oqyp berdi.