Almatyda Esenálıev kóshesinde kúndizgi saǵat 16:00 shamasynda 12 jastaǵy qyzdy kólik qaǵyp ketkeni habarlandy. Oqıǵa jaıaý júrginshiler ótkelinde bolǵan. Balany qaǵyp ketken júrgizýshi kóligin tastap, oqıǵa ornynan boı tasalaǵan, dep jazady Egemen.kz.
Aldyn ala derekterge qaraǵanda, oqıǵaǵa qatysy bar kólik – Hyundai Accent markaly avtomobıl. Qazir polıseıler kúdiktini anyqtaý jáne ustaý boıynsha izdestirý sharalaryn júrgizip jatyr.
«Izdeý jumystaryna ákimshilik polısııa basqarmasynyń qyzmetkerleri jumyldyryldy. Ol mindetti túrde ustalyp, jaýapkershilikke tartylady», dedi polısııa ókilderi.
Qyz balaǵa alǵashqy medısınalyq kómek kórsetilip, aýrýhanaǵa jatqyzýdyń qajeti bolmaǵan. Oqıǵanyń mán-jaıyn Bostandyq aýdandyq polısııa basqarmasy tekserip jatyr.