Ata-anasynyń qamqorlyǵynsyz qalǵan jáne jetim balalarǵa arnalǵan tálimgerlik taqyrybyndaǵy alǵashqy respýblıkalyq forým ótti, dep jazady Egemen.kz.
Alqaly jıynǵa Oqý aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova, Májilistegi Áleýmettik-mádenı damý komıtetiniń tóraǵasy Ashat Aımaǵambetov, Bala quqyqtary jónindegi ýákil Dınara Zakıeva, Islam Damý Bankiniń, halyqaralyq jáne úkimettik emes uıymdardyń ókilderi qatysty.
«Qazaqstanda tálimgerlik ınstıtýtynyń damýyna memlekettiń, úkimettik emes uıymdardyń jáne belsendi azamattardyń kúsh-jigerin biriktirý nátıjesinde qol jetkizip otyrmyz. Tálimgerlik ınstıtýtyn bekitý úshin aýqymdy jumys atqaryldy: Bala quqyqtary týraly zańǵa ózgerister engizildi, birneshe normatıvtik-quqyqtyq aktiler qabyldandy. Bul is-shara – jaı ǵana oqıǵa emes, tálimgerlik ınstıtýtynyń jańa deńgeıge kóterilip, tanylýynyń aıǵaǵy», dedi mınıstrlik ókili N.Ospanova.
Balalar úıleriniń tárbıelenýshilerin áleýmettendirýdiń tıimdi quraly retinde tálimgerlikti damytý men qoldaýdy talqylaýǵa arnalǵan is-shara «Dara» qaıyrymdylyq qorynyń «Tálimgerler» baǵdarlamasynyń 10 jyldyǵyna oraılastyryldy. Osy rette túsindire keteıik, tálimger – balalar úıindegi jasóspirimmen tájirıbe bólisetin, oǵan eresek ómir súrý daǵdylaryn ıgerýge kómektesetin, qıyn sátterde qoldaý kórsetetin jáne bolashaqty tańdaýda kómektesetin eresek adam. Tálimger bolý úshin Qazaqstan azamaty arnaıy oqýdan ótip, belgili bir talaptarǵa saı bolýy kerek. Al «Dara» qory 2015 jyldan beri júzege asyryp kele jatqan «Tálimgerler» baǵdarlamasy balalar úıiniń tárbıelenýshilerin tálimgerlerimen qaýyshtyryp, sol arqyly balalardy qoldaý men áleýmettendirýdi kózdeıdi.
Búginde baǵdarlama Qazaqstannyń 18 qalasynda jumys istep, 360-tan asa jasóspirimge derbes ómirge qadam basýǵa kómektesti. Baǵdarlamanyń aýqymy jyl saıyn keńeıip, qatysýshylar sany artyp keledi.
«Tálimgerler» baǵdarlamasy – aıqyn ádisteme men kásibı komanda. Biz kóp jetistikke jettik, biraq toqtap qalmaımyz, óıtkeni árbir muqtaj jasóspirimniń óz tálimgeri bolýy kerek ekenine senimdimiz», deıdi «Dara» qaıyrymdylyq qorynyń negizin qalaýshy Gúlnar Dosaeva.
Baǵdarlama alǵashqy bolyp Astana, Almaty jáne Qaraǵandy qalalarynda iske qosyldy. Sol kezde Qaraǵandy oblysy Bilim basqarmasynyń basshysy bolǵan Ashat Aımaǵambetov uzaq jylǵy jumystyń nátıjeleri men tálimgerlikti zańnamalyq deńgeıde bekitý mańyzdylyǵy týraly aıtyp ótti.
«On jyl ishinde biz tálimgerlik jobasynyń turaqty, tıimdi jáne shyn máninde qajetti ekenine kóz jetkizdik. Bul jobany zań deńgeıinde nege bekitý qajet? Eń aldymen barlyq múddeli taraptyń jaýapkershiligi men quqyqtaryn bekitýge kerek. «Tálimgerler» baǵdarlamasynyń tájirıbesi barlyq negizgi aspektini eskerýge múmkindik berdi: kim tálimger bola alady, onyń quqyqtary men mindetteri qandaı, tálimgerler mektebi qalaı jumys isteıdi, sertıfıkattaý máseleleri jáne barlyq taraptyń, sonyń ishinde memlekettik organdardyń jaýapkershiligi. Baǵdarlamanyń kópjyldyq tájirıbesi zańnamalyq túrde qandaı normalardy bekitý mańyzdy ekenin kórsetti», dedi Ashat Aımaǵambetov.
Forýmda sondaı-aq tálimgerler men olardyń tálim alýshylary sóz sóılep, óz dostyqtary týraly áńgimeledi: balanyń senimin qalaı jaýlap alǵany, onyń áleýetin qalaı ashqany, ózine senýge kómekteskeni týraly, sondaı-aq tálim alýshylardyń eresek ómirindegi naqty jetistikterin aıtyp berdi.