Búgin almatylyq «Qaırat» komandasy Chempıondar lıgasynyń jalpy kezeńi aıasynda mılandyq «Interge» qarsy match ótkizedi. Oıyn qarashanyń 5-inen 6-syna qaraǵan túni, Astana ýaqytymen 01:00-de bastalady, dep jazady Egemen.kz.
Buǵan deıin «Qaırat» Almatyda madrıdtik «Realdan» 0:5 esebimen jeńilip, odan keıin kıprlik «Pafosty» qabyldap, 0:0 esebimen teń tústi.
О́kinishke qaraı, matchqa «Qaırattyń» negizgi qorǵaýshysy Aleksandr Martynovıch qatysa almaıdy.
«Bári de oıdaǵydaı, biz «Interge» qarsy matchqa jaqsy kóńil-kúımen keldik. Qazaqstan chempıony atandyq, endi ári qaraı alańsyz daıyndalamyz. Árıne, qarsylastyń kúshti ekenin bilemiz, biraq bul bizdiń myqty komandaǵa qarsy deńgeıimizdi kórsetetin tamasha múmkindik. «Inter» tájirıbeli komanda. Italııa chempıonatynda ekinshi orynda kele jatyr jáne chempıondyqqa talasady. Chempıondar lıgasynda da joryqty jeńilissiz jalǵastyryp kele jatyr. Ne aıtýǵa bolady... Qıynǵa soǵary sózsiz, alaıda biz meılinshe batyl ári uıymdasyp oınaýymyz kerek», deıdi bas bapker Rafael Orazbahtın.
Mılandaǵy «Djýzeppe Meassa» stadıonynda ótetin tarıhı matchty tikeleı efırde QAZAQSTAN telearnasynan kórýge bolady. Oıynǵa portýgalııalyq Lýısh Godınıý tórelik jasaıdy.