Roza Baǵlanova atyndaǵy «Qazaqkonsert» memlekettik akademııalyq konserttik uıymy Iogann Shtraýs II 200 jyldyǵyna oraı mýzykalyq kesh ótkizedi, dep jazady Egemen.kz.
Uly maestronyń mereıtoıyna oraı Qazaq memlekettik sımfonııalyq orkestri Qazaqstandaǵy Avstrııa Elshiliginiń qoldaýymen onyń eń tanymal shyǵarmalary «Kóktem daýystary», «Imperator valsi», «Ádemi kógildir Dýnaıda», «Radeskıı marshy», sondaı-aq, vena mýzykasy repertýarynan konserttik baǵdarlama usynady.
Baǵdarlamadaǵy erekshe mánge ıe shyǵarmalardyń biri – Latıf Hamıdıdiń «Qazaq valsi». Ernest Hıotsldiń dırıjerligimen ótetin konsertte kórermen Shtraýstyń kóp oryndala bermeıtin polonez, polka jáne marshtarynyń erekshe áýenin tyńdaı alady.
Ernest Hıotsl álemniń eń bedeldi konsert zaldarynda óner kórsetken. Onyń óneri Musikverein (Vena), Philharmonie (Berlın), Carnegie Hall (Nıý-Iork), Teatro alla Scala (Mılan) sııaqty bedeldi sahnalarda joǵary baǵalanǵan. Ol Eýropa men Azııanyń jetekshi orkestrlerimen birlese jumys istep, álemdik klassıkalyq mýzyka aıasynda ár halyqtyń ulttyq naqyshyn názik sezinip, sheber jetkize bilýimen erekshelenedi.
Mýzykalyq kesh Qazaqkonsertte (Máńgilik el, 10/1) 08 qarasha, saǵat 18:00-de ótedi.