Halyq jazýshysy Sherhan Murtazanyń Talaptydaǵy turǵan úıi qazir ádebı-memorıaldyq qyzmet kórsetip turǵany málim. Talapty aýylyna tabany tıgen azamattar qara shańyraqqa soqpaı ketpeıdi. Munda qaıratker qalamgerdiń shyǵarmashylyq murasy, ózine jáne otbasyna tıesili biraz dúnıe saqtalǵan.
Qazaq ádebıetiniń alyp báıteregi turǵan aýyldy, ádebı-memorıaldyq úıdi arnaıy kórýge elimizdiń ár qıyrynan aǵylyp jatqan azamattar da jetkilikti.
Sheraǵańnyń shańyraǵynda onyń ádebı murasynan bólek, bılıard ústeli, túrli basylym tigindileri, ótken shaqtan syr shertetin birshama tarıhı zattar saqtalǵan. Munda kelgender murajaıdaǵy árbir qundylyqqa aıryqsha nazar aýdaratyny belgili. Sonyń biri – anasy Aıshanyń tigin mashınasy. Jyldar boıy saqtalǵan «Zınger» tigin mashınasy kózge ottaı basylady.
«Qara shańyraqta turǵan Raıhan apaıymyz bul tigin mashınasyn biraz ýaqyt buryn arnaıy tapsyrǵan bolatyn. Bizge kelýshiler Aısha apamyzdan qalǵan muranyń tarıhyna tereńirek úńilip jatady. «Zınger» tigin mashınasy Sheraǵanyń shyǵarmalarynda da az jazylǵan joq», deıdi ádebı-memorıaldyq úıdiń qyzmetkerleri.
Rasynda, Sheraǵa shyǵarmalarynda «Zınger» tigin mashınasyn ataý arqyly taǵdyrynyń taqtasyndaǵy aýyr kúnderdi esine túsiretini barshamyzǵa málim.
«Meniń anam Aısha sheber tiginshi edi. Baıaǵyda baı babadan qalǵan «Zınger» mashınasymen búkil aýyldyń kıim-keshegin osy Aısha tigetin. Sonda ártúrli matadan qalǵan qıyqtardy qurastyryp, maqtalap, túrli tústi áp-ádemi kórpesheler jasaıtyn», dep Sheraǵań da mehnatqa toly sol bir shaqty esine alýshy edi ǵoı. Qalaı desek te, jazýshy shyǵarmashylyǵynda jıi kórinis tapqan tarıhı buıymnyń qundy eksponat retinde saqtaýly turǵany kóńil qýantady.
Jambyl oblysy,
Jýaly aýdany,
Talapty aýyly