Qarjy uıymdary atynan jasalatyn alaıaqtyq áreketter jıilegen shaqta azamattardyń qaýipsizdigin arttyrý maqsatynda árbir qazaqstandyq bank pen mıkroqarjy uıymdarynan nesıe alýǵa óz erkimen tyıym qoıa alady. Bul «Stop-kredıt» dep atalatyn qyzmet Egov.kz portalynda jáne Egov Mobile mobıldi qosymshasynda qoljetimdi, dep habarlaıdy Egemen.kz.
Qarjylyq alaıaqtyqtan qorǵaný úshin azamattar banktik kredıtter men mıkrokredıtterdi resimdeýden erikti túrde bas tartý týraly ótinish bere alady. Bul múmkindik basqa tulǵalardyń atyna zańsyz nesıe rásimdeý jaǵdaılarynyń aldyn alýǵa baǵyttalǵan.
Qyzmetti kompıýter arqyly paıdalaný úshin egov.kz saıtynda jeke kabınetke kirip, «Servıster» bóliminen «Banktik qaryzdar, mıkrokredıtterdi alýdan erikti túrde bas tartý» qyzmetin tańdaý qajet. Odan keıin elektrondy nysandy toltyryp, ótinishke ESQ (elektrondyq sıfrlyq qoltańba) arqyly qol qoıý kerek. Nátıjeni «Qyzmetterdi alý tarıhy» bóliminen kórýge bolady.
Sondaı-aq bul qyzmetti Egov Mobile qosymshasy arqyly da oryndaýǵa múmkindik bar. Ol úshin «Qyzmetter» bóliminde «Salyqtar men qarjy» sanatyn tańdap, keıin «Kredıt alýdan erikti túrde bas tartý» qyzmetin tańdap, qajetti derekterdi engizip, suranysty elektrondy túrde rastaý qajet.
Qyzmetti iske qosqannan soń, azamattyń kredıttik tarıhynda qaryz alýdan bas tartqany týraly arnaıy belgi paıda bolady. Bul aqparat kredıttik bıýrolar arqyly bankter men mıkroqarjy uıymdaryna qoljetimdi. Eger azamattyń atyna nesıe rásimdeýge ótinim tússe, qarjy uıymdary avtomatty túrde ony berýden bas tartady. Al belgi qoıylǵan azamattyń kelisiminsiz nesıe resimdelse, mundaı qaryz jaramsyz dep tanylady jáne esepten shyǵarylady.
Qajet bolǵan jaǵdaıda bul tyıymdy kez kelgen ýaqytta alyp tastaýǵa bolady. Degenmen, bul shekteý kredıttik bıýrolarmen jumys istemeıtin lombardtar men ózge de uıymdarǵa qoldanylmaıdy.