Kemeler úshin jańa kanal iske qosyldy
Egıpet prezıdenti Abdel Fattah as-Sısı Sýes kanalynda kemeler úshin jańa kanal ashylǵandyǵy týraly jarlyqqa qol qoıdy. Bul jóninde «Reıter» agenttigi habarlady.
Kanal arqyly alǵashqy keme júzip ótken. Kanaldyń ashylý saltanatyna Reseı premer-mınıstri Dmıtrıı Medvedev, Fransııa prezıdenti Fransýa Olland, Iordanııa koroli Abdalla II, sondaı-aq, birqatar arabııalyq jáne afrıkalyq memleketterdiń ókilderi qatysqan. Osy saltanatqa baılanysty Egıpette 6 tamyz demalys kúni dep jarııalandy. Atalǵan qurylys jobasyna qatysty Egıpet úkimeti men halyqaralyq kompanııalar arasyndaǵy kelisim ótken jyldyń qazanynda bekitilgen bolatyn. Jobanyń jalpy quny 8 mıllıard dollarǵa baǵalanyp otyr. Jańa kanaldyń paıdalanýǵa berilýi el ekonomıkasyn qaıta qalpyna keltirýge aıtarlyqtaı demeý bolmaq.
Aralǵa avıasııany attandyrdy
Fransııa ótken jyldyń 8 naýryzynda radar ekranynan ǵaıyp bolǵan «Boıng-777» jolaýshylar ushaǵynyń synyqtaryn izdestirý úshin Reıýnon aralyna qaraı avıasııa men kemelerdi attandyrdy.
Bul týraly Fransııanyń qorǵanys, kólik jáne teńiz aýmaqtary mınıstrlikteri málimdegen. Joǵalǵan ushaqty izdestirý jumysy keshe bastaldy. Operasııaǵa tikushaqtar, teńiz kemeleri, sondaı-aq, jaıaý patrýlder tartylǵan. Reıýnon araly Fransııanyń aýmaǵyna kiredi, ol Úndi muhıtynda ornalasqan. 5 tamyzda Malaızııa tarapy osy aralda joǵalǵan laınerdiń synyqtary tabylǵanyn rastady. Keıbireýler ushaqtyń synyqtary osydan úsh aı buryn tabylǵanyn aıtady.
Joıqyn jarylystar tyıylar emes
Aýǵanstan astanasy – Kabýlda avtomobılge qoıylǵan jarylǵysh zattyń iske qosylýynan 8 adam mert bolyp, 200-ge jýyq adam jaralanǵan.
Kabýl polısııasynyń basshysy Abdýl Rahman Rahımıdiń habardar etýinshe, qaza tapqandar qatary óse túsýi múmkin. Sebebi, jarylys saldarynan qıraǵan ǵımarattyń úıindilerin arshý jumystary endi qolǵa alynǵan. Jarylys Kabýl ortalyǵyndaǵy turǵyndar qalyń qonystanǵan aýdanda bolǵan. Bul mańaıda, sondaı-aq, áskerı bólim ornalasqan eken. Qazirgi kezde terrorlyq áreket jaýapkershiligin eshqandaı uıym moıyndaryna ala qoıǵan joq.
Batystyń basqynshylyǵyna qarsylyq bildirdi
Týnıstiń premer-mınıstri Habıb Essıd batystyń Lıvııaǵa kez kelgen basqynshylyq áreketterine qarsy ekenin málimdedi. «Biz Lıvııadaǵy qazirgi qalyptasqan qıyn jaǵdaıdy 2011 jylǵy basqynshylyqtyń saldary dep esepteımiz», – depti ol.
Sonymen qatar, premer-mınıstr bergen suhbatynda terrorızmmen kúreste Batys elderinen kómek suraǵan. «Terrorızm – ulttyq problema emes, onda shekara joq. Terrorızmmen kúreste Týnıske kórsetilgen kómek, olardyń ózderin qorǵaýǵa jasalǵan kómek bolyp tabylady», – dep túsindirgen ol. Premerdiń sózine qaraǵanda, Týnıstiń kýrorttarynda terrorlyq áreketter jasaýy múmkin degen kúdikpen 150 adam tutqyndalǵan. Olardyń 15-ine terrorızmge baılanysty aıyp taǵylypty.
Sırııalyq arnaıy qyzmet ókilderi Máskeýge keldi
«Interfaks» aqparat agenttiginiń habarlaýynsha quramynda áskerı jáne qaýipsizdik jónindegi sırııalyq mamandar bar delegasııa Máskeýge kelgen.
Sırııanyń Reseı Federasııasyndaǵy elshiligi ókiliniń málim etýinshe, alty adamnan turatyn sırııalyq delegasııa Máskeýge keldi. Olar reseıliktermen terrorızmge qarsy kúresý máselelerin talqylaıdy. Sondaı-aq, dıplomat sapar aıasyndaǵy kezdesýdi kimder josparlaǵanyn, onyń maqsaty qandaı ekeni týraly aqparatty jarııa etýge óziniń quqyǵy joq ekenin atap ótken. Al reseılik derek kózderi Reseı men Sırııa terrorızmmen kúres máselelerinde tyǵyz yntymaqtastyqta jumys istep kele jatqandaryn keltiredi.
Ekstremızmdi nasıhattaǵan materıaldardy ákelgeni úshin...
О́zbekstan soty Namanǵan qalasynyń turǵynyna qatysty úkim shyǵardy. Ol kontrabandalyq jolmen Reseıden dinı ekstremızmdi nasıhattaıtyn materıaldardy ákelgeni úshin tutqyndalǵan.
Aty-jóni kórsetilmegen ol osy qylmystyq áreketi úshin 5,5 jylǵa bas bostandyǵynan aıyryldy. Sankt-Peterbýrgten ushyp kelgen ol Ándijan qalasynyń áýejaıynda ustalypty.Keden qyzmetkerleri onyń bagajynan dinı mazmundaǵy bir myńnan astam aýdıo jáne beınematerıaldardy tapqan. Júrgizilgen saraptama «О́zbekstan ıslam qozǵalysy» ekstremıstik uıymy daıyndaǵan leksııalar, sondaı-aq, «Islam memleketin» maqtaǵan ánder ekendigin kórsetken.
Internet materıaldary negizinde ázirlendi.