Qazaqstandyq Alatau City Bank ıesi Vıacheslav Kım men DDH (North America) Inc. kompanııasy Qazaqstan Respýblıkasynyń Jasandy ıntellekt jáne sıfrlyq damý mınıstrliginiń qoldaýymen quny 300 mıllıon dollar bolatyn ózara túsinistik týraly memorandýmǵa qol qoıdy, dep habarlaıdy Egemen.kz.
Maqsaty - sıfrlyq maınıng salasyndaǵy strategııalyq seriktestikti nyǵaıtý, energetıkalyq jáne esepteý ınfraqurylymyn jańǵyrtý, elde zamanaýı derekterdi óńdeý ortalyqtaryn qurý, maınıng salasyndaǵy ashyqtyq pen tıimdilikti arttyrý úshin ınvestısııa tartý.
«Elimiz sıfrlyq aktıv salasyndaǵy yntymaqtastyqty ashyq túrde júrgizedi. Qazaqstandyq ınvestor men amerıkalyq maınıng kompanııasy arasyndaǵy memorandýmǵa qol qoıý - halyqaralyq áriptestikke, tehnologııa almasý jáne ornyqty ınvestısııalyq baılanystardy damytýǵa degen ustanymdy kórsetedi. Bul ozyq tájirıbeni paıdalaný, quzyretterdi kúsheıtý jáne sıfrlyq maınıng pen jasandy ıntellekt salalarynda birlesken ınnovasııany damytý úshin berilgen múmkindik. Mundaı jobalar Qazaqstannyń jahandyq sıfrlyq ekonomıkadaǵy senimdi jáne jaýapty seriktes retindegi mártebesin nyǵaıtýǵa yqpal etedi», dep atap ótti Qazaqstan Respýblıkasy Premer-mınıstriniń orynbasary – Jasandy ıntellekt jáne sıfrlyq damý mınıstri Jaslan Mádıev.
Alatau City Bank ıesi Vıacheslav Kımniń aıtýynsha, derekterdi óńdeý naryǵyndaǵy álemdegi jetekshi kompanııalardyń birimen memorandýmǵa qol qoıý – qazaqstandyq bıznestiń aqparattyq tehnologııa, sıfrlyq aktıvti damytý, jasandy ıntellekt jáne Qazaqstan ekonomıkasy úshin basym baǵyttaǵy basqa da salalardaǵy halyqaralyq áriptestikti nyǵaıtýǵa baǵyttalǵan.
Biz bul seriktestikti tek ınvestısııalyq joba retinde ǵana emes, ınnovasııalardy jetkizý, energetıkalyq jáne esepteý ınfraqurylym salasyndaǵy saraptamany arttyrýdyń, bultty tehnologııalardy jáne bolashaqtyń sıfrlyq ekonomıkasynyń basqa da ajyramas elementterine qatysty biregeı múmkindik retinde qarastyramyz», dep atap ótti ol.
Aıta keteıik, DDH (North America) Inc. AQSh-ta sıfrlyq maınıng salasynda jumys isteıdi. Kompanııa derekter ortalyqtaryn basqarady jáne joǵary júktemeli júıeler salasyndaǵy ozyq tehnologııalardy engizedi, sol arqyly sıfrlyq aktıvter maınıngine arnalǵan turaqty jáne tıimdi ınfraqurylymdy qamtamasyz etedi.