Zeınetaqy jınaǵynyń kólemi kóbeıdi

Mindetti zeınetaqy jarnalary (MZJ) esebinen qalyptasqan zeınetaqy jınaǵynyń kólemi – 24,40 trln teńge, 12 aıdaǵy ósimi – 19,8%.  Mindetti kásiptik zeınetaqy jarnalary (MKZJ) jónindegi zeınetaqy jınaǵy –  726,94 mlrd teńge, 12 aıdaǵy ósim – 15,6%. Bir jyl ishindegi eń úlken ósimdi 32,8% erikti zeınetaqy jarnalary (EZJ) jó­nin­degi jınaq kórsetti, olardyń kólemi – 9,47 mlrd teńge.

Salymshylardyń (alýshylardyń) zeınet­aqy shottaryna 2024 jylǵy 1 qańtardan bas­tap túse bastaǵan jumys berýshiniń mindetti zeınetaqy jarnalary (JMZJ) 596,18 mlrd teńge boldy. Zeınetaqy jınaǵynyń kólemi zeınetaqy jarnalary men ınvestısııalyq kiris túrindegi kiris aǵyny esebinen ulǵaıady.

Bıylǵy 9 aıda salymshylardyń shottaryna 2,37 trln teńge mólsherinde zeınetaqy jar­nasy tústi. Bul ótken jyldyń sáıkes kezeńin­­degi kórsetkishten 17,8%-ǵa nemese  56,75 mlrd teńgege artyq.

MZJ esebi júrgiziletin jeke zeınetaqy shottaryna jyl basynan bastap 1 qazanǵa deıin 1 937,66 mlrd teńge (ótken jyldyń sáıkes kezeńimen salystyrǵanda MZJ kólemi  9,97%-ǵa ulǵaıdy), MKZJ – 100,69 mlrd teńge (ósim – 19,1%), EZJ 1,82 mlrd teńge tústi.

9 aıda BJZQ-dan jarnalardyń barlyq túrine qatysty jasalǵan tólemder men saqtan­­dyrý uıymdaryna aýdarymdar 1 368,27 mlrd teńgeni qurady. Bul byltyr jasal­­ǵan tólemder kóleminen 1,6 ese nemese 508,31 mlrd teńgege kóp. Tólemderdiń basym bóligi tur­ǵyn úı jaǵdaıyn jaqsartýǵa, emdelýge arnalǵan birjolǵy zeınetaqy tólemderiniń (BZT) enshisinde – 823,82 mlrd teńge. Zeınet jasyna tolýyna baılanysty tólemder 12 aıda 23,43% ulǵaıyp, 181,81 mlrd teńgege jetti. BJZQ-dan zeınet jasyna tolýyna baılanysty kestemen beriletin ortasha aılyq tólem – 35 691 teńge.  

Jyl basynan beri muragerlikke qatysty – 50,49 mlrd teńge, elimizden tys jerge turaq­ty turýǵa ketýge baılanysty – 32,60 mlrd teńge, múgedektigi bar adamdarǵa – 2,33 mlrd teńge, jerleýge 8,03 mlrd teńge kóleminde tólem jasaldy. Saqtandyrý uıymdaryna 269,19 mlrd teńge aýdaryldy.