Kún sanap aýmaǵy artqan megapolıstiń ekologııalyq ahýaly tabıǵat janashyrlaryn kópten alańdatyp júrgen másele. Qalada aýa sapasyn jaqsartý men qorshaǵan ortaǵa zııandy áserdi azaıtý baǵytynda keshendi jumystar qolǵa alynǵan, dep habarlaıdy Egemen.kz.
О́ńirlik kommýnıkasııalar qyzmeti alańynda jýrnalıstermen júzdesken Almaty qalasy Ekologııa departamentiniń basshysy Dinmuhamed Lesbekov aýa sapasyn jaqtartýǵa baǵyttalǵan bastamalar jaıly málimdedi.
Onyń aıtýynsha, qazirgi ýaqytta qalada tórt negizgi baǵyt boıynsha jumys júrip jatyr: jylý elektr ortalyqtaryn jańartý, jeke turǵyn úılerdi gazben qamtý, kólik shyǵaryndylaryn azaıtý jáne aýanyń sapasyn avtomatty baqylaý júıesin engizý.
«Ekologııalyq jaǵdaıdy jaqsartý – bizdiń basty maqsatymyz. Bul baǵyttaǵy sharalar qala turǵyndarynyń ómir sapasyna tikeleı áser etedi», – deıdi maman.
Qalanyń energetıkalyq ınfraqurylymyn jańartý ekologııalyq jaǵdaıǵa tikeleı yqpal etetini belgili. 2017 jyly JEO-1 tolyq gazǵa aýystyrylǵan bolatyn, búginde JEO-2-de keń kólemdi jańǵyrtý jumystary júrip jatyr. 2022–2026 jyldarǵa arnalǵan joba aıaqtalǵan soń, jyl saıynǵy zııandy shyǵaryndylar kólemi 37,1 myń tonnadan 2,7 myń tonnaǵa deıin qysqarmaq.
Jaýaptylardyń sózine sensek, gazdandyrý deńgeıi – 99,4 paıyzǵa oryndalǵan. Qalalyq gaz jelileriniń uzyndyǵy 6 myń shaqyrymnan asady, sońǵy jyldary taǵy 24 shaqyrym jańa jeli tartylǵan.
Almatyda 706 myńnan astam kólik tirkelgen. Budan bólek, kún saıyn qalaǵa shamamen 400 myńǵa jýyq syrttan kelgen kólikter qatynaıdy. Bul aýa sapasyna eleýli áser etedi.
Qaladaǵy 19 ekologııalyq bekette polısııa jáne ekologııa qyzmetkerleri birlesip tekseris júrgizedi. Bıylǵy 9 aıda 18 myńnan astam quqyq buzýshylyq anyqtalyp, jalpy somasy 355 mıllıon teńgeden astam aıyppul salynǵan.
- Keı kólikter áli de aýany lastap jatyr. Mundaı jaǵdaıdy boldyrmaý úshin kólik ıeleri tehnıkalyq qyzmetke der kezinde júgingeni jón. Taza aýa – bárimizdiń ortaq jaýapkershiligimiz.
Aýany qorǵaýdyń jańa erejeleri ázirlenip jatyr. Qujatta shyǵaryndylardy baqylaý, zııandy zattardyń mólsherin azaıtý, tómen lastaný aımaqtaryn qurý jáne aýa sapasyn úzdiksiz qadaǵalaý qarastyrylǵan,- deıdi D. Lesbekov.