Almatynyń ortalyǵynda jol talǵamaıtyn kólik qozǵalysty rettep turǵan polısııa qyzmetkerin qaǵyp ketti, dep habarlaıdy Egemen.kz.
Polısııa departamentiniń málimetinshe, oqıǵa 7 qarasha kúni saǵat 15:10 shamasynda Jeltoqsan jáne Sátbaev kósheleriniń qıylysynda bolǵan.
– Toyota markaly avtokóliktiń júrgizýshisi Jeltoqsan dańǵyly boıymen ońtústik baǵytta kele jatyp, Sátbaev kóshesine solǵa burylǵan sátte joldyń júris bóliginde jáne qozǵalysty qolmen rettep turǵan polısııa qyzmetkerin qaǵyp ketken. Jol-kólik oqıǵasy saldarynan polısııanyń aǵa leıtenanty dene jaraqatyn aldy, – delingen polısııa departamentiniń baspasóz qyzmeti taratqan habarlamada.
Oqıǵanyń mán-jaıyn Bostandyq aýdandyq polısııa basqarmasynyń qyzmetkerleri anyqtap jatyr.