Qazirgi zamanda sport áleýmettik ádildiktiń jańa formasyna aınalýda. Bul úrdis ásirese Aqmola oblysynda aıqyn baıqalady: munda árbir azamat, aýyl balasynan bastap erekshe qajettilikteri bar azamattarǵa deıin, sportpen aınalysa alatyndaı jaǵdaı jasalýda, dep habarlaıdy Egemen.kz.
«Bizdiń maqsatymyz – sportty tek rekordtardy baǵyndyrýdyń joly ǵana emes, ómirdiń bir bóligi etý. Erekshe qajettilikteri bar adam da, aýyl balasy da, zeınetker de ózin úlken qozǵalystyń bir bóligi ekenin sezinsin», – deıdi oblystyq dene shynyqtyrý jáne sport basqarmasynyń basshysy Ardaq Tólendın.
Búginde óńirdiń 329 myńnan astam turǵyny, ıaǵnı halyqtyń 41,8%-y júıeli túrde sportpen aınalysady. Olardyń jartysyna jýyǵy – aýyl turǵyndary. Bul – buqaralyq sportty jáne qoljetimdi ınfraqurylymdy damytý boıynsha júıeli jumystyń nátıjesi.
Aqmola oblysy damubala.kz platformasy arqyly memlekettik sporttyq tapsyrysty belsendi túrde júzege asyryp keledi. Bul qural balalar sportyn, ınklıýzıvti jáne buqaralyq sportty damytýǵa baǵyttalǵan jáne úkimettik emes uıymdarmen, sport klýbtarymen, jeke jattyqtyrýshylarmen seriktestik formatynda iske asyrylady. Iаǵnı ár turǵyn óz úıiniń mańynan seksııa taýyp, tegin nemese óte tómen baǵamen sportpen shuǵyldana alady.
«Memlekettik sporttyq tapsyrys júıesi shaǵyn zaldar men klýbtarǵa jańa tynys berdi. Endi aýyl jattyqtyrýshylary aýyldan ketpeı, kerisinshe toptar jınap jatyr. Bul – naqty jumys oryndary men sportty áleýmettik lıftke aınaldyratyn orta», – deıdi Ardaq Tólendın.
Erekshe qajettilikteri bar adamdarǵa da zor kóńil bólinýde. О́ńirde úshinshi jyl qatarynan az qozǵalatyn azamattar úshin sport zaldaryna tegin barýdy qamtamasyz etetin áleýmettik joba júzege asyrylýda.
«Búgingi tańda baǵdarlamaǵa 347 adam, onyń ishinde 113 bala qatysýda. Bul jaı ǵana jattyǵý emes, qoǵamǵa beıimdelý, óz kúshine sený jáne ómirge belsendi aralasý múmkindigi», – dep atap ótti Ardaq Tólendın.
Infraqurylymnyń da mańyzy zor. Oblysta 1124 sport nysany bar, sport saraılary men basseınderden bastap hokkeı korttary men ashyq alańdarǵa deıin jumys istep tur. Tek sońǵy jyldyń ózinde olardyń sany 17-ge artqan. Sporttyq nysandarmen qamtamasyz etilý deńgeıi shamamen 65%-dy quraıdy jáne bul kórsetkish ósip keledi. Aýdandarda jańa tennıs korttary, jekpe-jek zaldary men shańǵy bazalary ashylýda.
Qarttar arasynda da sport belsendi túrde damyp keledi. Aýdan ortalyqtarynda olar úshin jattyqtyrýshylar jáne dárigerlerdiń baqylaýymen tegin densaýlyq toptary jumys isteıdi.
Sonymen qatar, óńir sporttyq rezerv tárbıeleýdi de qolǵa alǵan. Olımpıadalyq emes jáne ulttyq sport túrleri boıynsha Joǵary sport sheberligi mektebinde 400-den astam sportshy daıyndalady. Bul baǵyt dástúr men zamanaýılyqty ushtastyryp, aýyldaǵy talantty jastarǵa kásibı turǵydan ósýge múmkindik beredi.
Aqmola oblysy sporttyń tek rekordtar isi emes, teń múmkindikter quraly bola alatynyn dáleldep otyr.