Qyrǵyzstanda 10 qarashadan bastap Jogorký Kenesh depýtattarynyń merziminen buryn ótetin saılaýy úshin saılaýaldy úgit-nasıhat kezeńi resmı túrde bastaldy, dep habarlaıdy Egemen.kz.
Saılaýaldy úgit-nasıhat mıtıngterde, jınalystarda, BAQ arqyly, sonymen qatar ınternet-resýrstarda júrgizilýi múmkin. Saılaý komıssııalary úgit-nasıhat pen azamattarmen kezdesýlerdiń uıymdastyrylýyn qamtamasyz etýi tıis.
Alaıda, Qyrǵyz Respýblıkasynyń aýmaǵynda sheteldik BAQ-ta úgit-nasıhat júrgizýge tyıym salynǵan. Saılaý kezeńinde sheteldik tele jáne radıohabarlardyń qaıta habar taralýy jazbasha túrde ǵana júzege asyrylady.
Zańǵa sáıkes, kelesi tulǵalar úgit-nasıhat júrgize almaıdy:
Memlekettik azamattyq jáne mýnısıpaldyq qyzmetkerler; Memlekettik saıası laýazymdy qyzmetkerler (Jogorký Kenesh depýtattary emes); Arnaıy memlekettik jáne mýnısıpaldyq laýazym ıeleri (jergilikti keńes depýtattary emes); Saılaý komıssııalarynyń músheleri; Halyqaralyq baqylaýshylar; Dinı qyzmetkerler; Qaıyrymdylyq uıymdarynyń quryltaıshylary men músheleri; 18 jasqa tolmaǵandar; Sheteldik azamattar men uıymdar; Azamattyǵy joq adamdar; Jergilikti ózin-ózi basqarý organdarynyń qyzmetkerleri.Qyrǵyzstanda Jogorký Kenesh depýtattarynyń merziminen buryn ótetin saılaýy 2025 jylǵy 30 qarashaǵa belgilengen. Prezıdent Sadyr Japarov halyqqa jasaǵan úndeýinde parlamenttik saılaýdyń barysyn jeke baqylaýǵa alatynyn jetkizdi.
2025 jylǵy 1 qazanǵa qaraı respýblıkada 4 mln 287 myń saılaýshy tirkelgen, olar saılaýǵa qatysýǵa quqyly. Saılaý jáne referendým ótkizý ortalyq komıssııasy 5 qarashada Qazaqstanda qosymsha úsh saılaý ýchaskesin – Almaty, Taraz jáne Shymkent qalalarynda ashý týraly sheshim qabyldaǵan. Buǵan deıin Astana (QR Elshiligi), Almaty (QR Bas konsýldyǵy), Atyraý jáne Qaraǵandy qalalarynda ýchaskeler ashylǵan bolatyn.
Merziminen buryn ótetin Jogorký Kenesh saılaýyna 467 kandıdat tirkelgen, 127 halyqaralyq baqylaýshy akkredıtasııadan ótken.