Qaraǵandy oblysynda ózin áleýmettik kómek jobasy retinde kórsetken «Úmit Samǵaý» uıymy qarjy pıramıdasyn uıymdastyrdy degen kúdikpen tergelip jatyr. Top 400-den astam azamattyń senimine kirip, 100 mln teńgeden astam qarajat jınaǵan, dep habarlaıdy Egemen.kz.
Tergeý málimetinshe, uıym ózin qaıyrymdylyq jobasy retinde tanystyryp, jalǵyzbasty analarǵa jáne turmysy tómen jandarǵa materıaldyq kómek kórsetýdi maqsat etkenin málimdegen.
Alaıda shyn máninde uıym azamattardy joǵary tabysqa ýáde berip, qarjy pıramıdasynyń klassıkalyq úlgisimen jumys istegen. Qatysýshylarǵa salǵan qarajatynyń kólemine qaraı 300%-dan 800%-ǵa deıin paıda túsetini aıtylǵan. Salym neǵurlym kóp bolsa, tabys ta soǵurlym joǵary bolatyny týraly sharttar usynylǵan.
Nátıjesinde belgili bolǵandaı, qatysýshylarǵa tólengen qarajat naqty kásipkerlik nemese ınvestısııalyq qyzmetten emes, keıin qosylǵan salymshylardyń aqshasy esebinen berilgen. Bul júıe biraz ýaqyt jumys istegenimen, aqyr sońynda júzdegen adamnyń qarjylyq shyǵynǵa ushyraýyna sebep bolǵan.Tergeýshilerdiń aıtýynsha, qarjy shemasyn uıymdastyrǵandar ózderiniń týystary men tanystaryn «dropper» retinde paıdalanyp, salymshylardyń aqshasyn solardyń atyna ashylǵan bank kartalary men shottaryna qabyldap otyrǵan.
Qazirgi tańda anyqtalǵan málimet boıynsha, 400-den astam adam atalǵan jobaǵa qatysqan, al jınalǵan qarajattyń jalpy kólemi 100 mıllıon teńgeden asyp ketken.
Sot sheshimimen kúdikti tulǵanyń páteri men kóligine tyıym salyndy. Qazir istiń barlyq qatysýshylary anyqtalyp, tergeý sharalary jalǵasyp jatyr.